Oset ka alinung angati ka anguba dokan ka lapokogo

Mokokchung, Nov 4 (TYO): Zünger mapa mengui alirtem asoshi mapa meranga inyaker sen aatsü tatishitsü tajung sayua Sp. Marningsang Kichui Mokokchung nung “Health & Wealth Depot” ta sür dokan tasen ka Hogulbarnü Kichutzar Complex Mokokchung nung lapokogo.
Tanü iba dokanji Mokokchung Town Baptist Arogo (MTBA) associate pastor, Wb. P. Toshi aser missionary Wb. Tiaaküm Lcr nati meshiteta sarasademer lapoktsü.
Iba dokan nungji anema alitsü asoshi anepaluba oset (healthcare) den kidang amshiba kisen (Homecare), cosmetic balala, temang tashi idaktsüba chiyungtsü/mozütem (energy products), nijai amshiba osettsüset (personal care & fitness equipment), aluyimba nung amshiba, electronics oset aser ano tapu balala angutsü. Osang tajung kaji; iba dokan nung tashitak tapu ajak (A-Z) indang mozütem angutsü.
Iba dokan nung KEVA industry-i yangluba osettem dang angutsü aser yangi anguba chiyungtsü aser mozütemji ajak kanga junga tendanger temang nung timtem magütsüba (organic & natural)-tem dang lir, ta dokan kibur Sp. Mar Kichui osangbener den jembidang metetdaktsü.
Iba dokan nung takar sensaker ajaki alitettsüsa senpak 59/- nungi tenzüker 19,999/- tashi indang osettem angutsü aser oset ajak nung ka alira angati ka dena agütsür (buy one and get one free), ta Marisa ashi.
Taruba December ita tashi nungbo KEVA indang android phone aser laptop-tema angutsü aser item nungjia ka alira talila ka agütsüba yimya nung dang aotsü, ta paisa shisem.
Pai iba dokan tenzükba nükjidong lemsatepdang, tanü asüng züngaka mapa angutsü temela masü, anungji, peisasa mapa meranga inyaktsü mulungteter iba maparen ya tenzüker, ta metetdaktsü. ‘Tangar dak metaloka melii rongsen nung nüji angutsü (financial freedom) nükjidong lir’, ta paisa shiem.
KEVA ya Indian nung amenoka aliba industry tulu rongnung ka lir. Iba ya Nagaland-i arur ano küm majung aser Mokokchung nungbo ita anashi dang asütsü, ta angazüker. Kari danga KEVA indang osang tejangja metetnüra iba website: www.kevaind.org ajanga rangrangtettsü mesüra Sp. Marningsang (9862790822) den tongteprateptsü akok.