Osettsüset nung jenjang atuba ajanga tamakok angu: Rahul

Bhubaneshwar, September 12 (Agencies): Congress tatong Tir Rahul Gandhi-i, Right to Information Act ajanga aibelen jangjar aser 2014 küm General election nung Congress-i tamakok anguba tongtibang kuli rongnung kaji, nüngdakba osettsüet aser chiyungtsü nung jenjang atuba ajanga liasü, ta ashi.
“Aibelen kar liasü. Totzü tazü nung jenjang atuba densema nüngdakba osettsüset nung jenjang atuba ajanga onoki vote magu. RTI osang ajanga-a onok anema kuli sayuba kar ngutetogo. Iba ya ajanga yimsüsüba nung ochishiba sayur, iba ozüng tasen ajanga sorkar aibelen kar sayuogo,” ta Rahul-i ashi.
“Congress party-i senotsü nunga timtem kar ajuru. BJP-i corporate nungi senotsü angu aser election nung sen kanga molamoshi inyok,” ta paisa ashi.
Rahul-i Ato kilonser Narendra Modi dak o jembitsü sempet aliba atema tenüngsang agütsü, saka iba nungji taitsüba o densema liasü.
Congress leniri, “Pa (Ato kilonser) ya yazü nangzüktsü nung kanga tsüngro tasong. Modi–i jembiba ama ni mejembitettsü ta ni nangzüker. Pai onük jembiba mapang yazü jembitetba ajanga pai takok angur. Ni ochi nung amanger aser ochi jembir,” ta ashi.
Land Bill magizüktetba ya nüburtemi takok anguba ka lir, ta Congress tatong Tir Rahul–i ashi.
Paisa, GST Bill nung par party nung lenirtem tsüngda tangatetba balala lir, saka NDA sorkari iba onük nung o melemtepner, ta ashi.
Rahul Gandhi-i Congress Tir menden benzüktsü onük aser Sonia Gandhi-i maneni iba menden küm ka abentsü dak sentakba nung pai, “Ibaji Congress Working Committee telemtetba liasü,” ta ashi.
Rahul-isa Bihar, Bhubaneshewar nung SC aser ST nüburtem den jembiogo, aser iba mapang nung pai Naveen Patnaik aija jembi.
Rahul-i, “Odisha terenlok maparen nung Naveen Patnaik ya tetsükdaktsü ka lir. Pai SC, ST aser minority nüburtem khenyongi sendokogo,” ta ashi.