Oshi arangshiba

Alima nung kechi oshi südir süaka nok chiradaktsütsü arangshiba amato marangshira, tejembinütsü maket akümtsü, anungji mejembitsü aser pei tetsü oshiji sensosangertemi sapua mejembira kopi melii samatsü. Iba amaji pei tetsü oshi jembir mali samatsü ana nung aliba oshitem rongnung Ao oshi ya ka lir. Iba tebilemtsü khuretji meteta Ao Senden kübok Ao Senden Literature Board-i Ao oshi mesamadaktsüi tajungba renloka aotsü asoshi kanga meranga inyakba angur. Atangji, state government-ia School Education department ajanga Nagaland nung alir Naga kin shia oshi mesamadaktsüi wazüka ayutsü asoshi school nung züngdaktsür. Ajisüaka, school nungi University tashi azüngtsüsa Naga kin shiai pei tetsü oshi nung tazüngtsü kaket adoka anepalu mesütetra, züngnüyonga tazüngtsü kaket makatsü aser kaketreju nung azüngba aser jembiba oshi ka mesüra lanurtemi iba oshiji nümadanga mejembitsü, anungji samadoktsü. Tanübo asenok tia ajung, Aor asoshibo ASLB-i anepalua post graduate jenjang tashi nung azüngtsüsa kaket adoka lir. Ibayongji, joko 2006 küm nungibo ASLB-i achaayanga class ter tema azüngertem asoshi Arangtet Tatidang agia arudagi. Iba amaji school nung dang masü saka college aser university nung Ao oshi azüngtsü aser sayutsüsa akümba agi oshi renlokdaktsüba den külemi ano nisung karbo tesayur mapa inyaktsü maongka angur. Ano, osangkaket adokba mapatem nunga item arangtet tatidang nung takok angurtem nüngdaker. Iba amaji Tsüngremi agütsüba tetsü oshi mesamadaktsüi renlokdaktsüba nung temoatsü aika dena lir. Aji oda, tanübo ASLB ajanga Ao oshi nunga amshitettsüsa ita aser anogo tenüng dena adoka Zonizüng (Calendar) amshi tenzükba ya asenok Ao kin asoshi takok tukuka asütsü. Atangji, Zonizüng nung amshi tenzükba ita aser anogo tenüngtem ya nisung ajakibo shitaka ta magizüktetba ola angashiogo. Itemji tim dang kechiyong kodanga amshia maruba ita aser anogo tenüng tasen ka nisung ajaki shitaka ta sütettsüsa bener arutsübaji mapa temela masü. Ibayongji, ASLB ajanga Zonizüng asoshi telemtetba magidang osangkakettem ajanga tazüngertem nungi tebilemba meshia metetdaktsüogo. Aji oda, nisung aikati ASLB den peii meteta aliba aser tebilemba lemsatepbatem nungi tang jatetja aliba ita aser anogo tenüng ya agitsü lemtet südi ta angatetter. Tenüng aika tamasa ajadangbo meputep aser kitakkitaker amai asütsü saka jashia-jashia aser amshia-mashiang tajungba aser shitak küma jatettsü. Iba tangatetba nung nübortemia ASLB ajanga inyakba mapatem ya asen oshi arangshiba aser renlokba mapa tuluka inyaker ta angateta tajunglen nungi yariteptsü junger. Ano, Ao Senden aser ASLB-ia akok tashi nübortemi tebilemba lemsatepbaji pelashishia agizüktsü tim aser pei bilemba ashitsübabo menokdangtsüla. Nübortemibo aika ashitsü saka agitsü-magitsüba telemtetbajibo tetia ait nung mena alirtemiang agitsü. Aji oda, tang ASLB ajanga Zonizüng adoka amshiba yagi Aortem rongnung shisalemsateptsüsa mapang tajung ka bentsür aruogo ta repranger. Atangji, nisungi dang inyaker asünungji merajem aser mabensaba alitsüa akok, anungji merajemba kar rajemtsüsa aser mabensaba kar ano tajungba abensatsüsa nisung kari danga shisa tasen kar agütsüra, ibaji Aor oshioben arangshiba aser renlokba nung teyari tuluka asütsü ta bilema ASLB-ia agizüktsü tim. Iba ama oshioben arangshiba aser renlokba mapa nung akok tashi tejangrartembo marendaki shilem agitsüsa lenmang sadema lapoktsüdi aser nüngjakojajia tajungba-tajungba aser tapetba-tapetba melenshia arangshipet arangshia aotsü merangdi.