Oshi aser Zülumen nung meshisadangi amshiba ajanga teraksa aluba shisadangdi

~  A.   I. Maong Aier Retd. G/T, Alongmen Ward, Mkg.

Asen oshi aser O zülu ya orrlem ozüng nung ajemdaker adokba lir. English grammar nung ‘Grammar is the law of correct speaking and writing’ ta shia lir. Sürabang  iba ozüng nung shia ali ama asenoki oshi ratet den zülumenji shitak amshi nung dang itemji renloktsü ta angatettsüla. Item ajak asoshi ni kü o tatsü agi tatongi lemsateper.
Nüngja ratet den zülu meputepba: Impur, Imsong, Imchen, inzü aser injang. Mezüngbuba olong asemji yim nungi adenshia jatetba lir. Anungji Yimpur, Yimsong aser Yimchen ta zülutsüla. Tanabuba olong ana ya yin (merang) nungi ratet asünung, yinzü ta züluba ama injang ta mesüi yinjang ta zülutsüla.
‘I’ agi tenzüka aliba nisung tenüngtem ya yim/yimden/yimsüsüba aser ymsüyimbong nungi agitetba teratet lir. Saka dang shirnok tenüngsa iba ojang yagi tenzüka lir, itemji certificate aser document ajak nung inokadokerji item nübur ya masü tashi melentsü tasak. Saka tarutsü nung asen chir aser semchirtem tenüng jatsüdang ‘Y’ agi melen nungang oshi ratet den zülumen liromedemtsü.
Anütettsü: Iba nüngja ya ‘Anütetzü’ ta asü nung shitak ta lemsatepdang. Saka orrlem ozüng nung shidangra, ya-a tai adoker. Temetettsü; meyi mapang asenoki anü ya hopta jungaka  mangur, aser ano aonunga mangur. Süra anü manguba mapang koma tetzütsü (?) Anüngji iba nüngja ya ‘mapangtettzü’ ta asünungang tenüng ratetji shitak adoker.
Mapang shia ocet zülur aikati oshi aser o zülu shitakba aginüa lemsatepba züngshia kanga pelar. Parnoki teyuba aika shitak ta züngshiogo. Kar nung tashishitsü aliba tang ni yamai shidanger. Asen oshi nung ‘E’ ya level aser low-tune nung anidaker, ‘Ü’ ya high tune olasü nung kanga nüngdaker. Tia ka -a Computer nunga iba ojang ya inoksema lir. Yamaji mali ka asü nunga odang adoker. Iba ojang ya Germany nunger O zülu nunga lir. World Cup mapang par lima tetsüng polo asayadang stadium telong nung zülua angutsü. Merang nung tapuk aliba agi merangpong, ta Mongseneri ajar aser iba ola ya ‘prang ‘ ta asaba agi prangbong ta Jungliri ajar. Anungji nüngja ajak ya junger. Lutet ola sashia adokba olong ka ‘Süh’ ta amshi nungang shitak. Saka yangi ‘Scü’ ta amshia angur. Ano iba amaji olong ka ‘Shihti’ [Elephant] ya ang shitak. Saka shiti ta tang amshiner amai angateter. Ano iba ya mesükba ka ‘shidi’ (deal) ya shitak. Kari ‘shidi’ iba ya letter ta amshir aser kari ‘shity’ ta amshir. Anungji shidi (deal) ta amshir shity (letter) ta amshia junger. Shity tatembang  nung ‘y’ amshiba ya Engraj olasü tang masü asen olasü agia arur.
‘Bo aser Bu’ tebendang, tune ajanga shisadangra yamai aruba oren anana ajanga sayur. Nabo kidang tang ata liang. Onokbo marutsü, Tanübu tzünglu arutsü amai, osang tamajungbu kecha mali. ‘Ni aser Ni-i’ tebendang oren kaka ajanga sayur. Ni kanga shiranger, Ni-i ne dang otsü ka shidi. ‘Kong aser kung’ tebendang: Asetkong, Ongpangkung etc.
Anogoshia paper osang nung nüburtemi nüngja ka nung o zülu balala ngua olasü den liromedma adokba o zülu olong ishika sayudanger. Itemji, pongu-pokpu-tuku-kodak-shidak-ayiür-aiennür (foreigner)-benjong-benjungmong-Aoer-tapo(kind)-tapu-tapuh etc.
O Tembang: Otsü tatsüka shia kü o tembangdi. Khen mapang ka nung scientist kati Tsüngrem dang nia nisung yanglutsü shia lir ta ashi. Süra nai nisungji yangludangang ta Tsüngremi pa dang ashi. Anungji Scientist ba jagi nisung yanglutsü asoshi ali tuya liasü. Aji ngua Tsüngremi pa dang, Hai, Ni yangluba li nungji tekongshi, nai yangluba ali agi yangluang ta ashi. Tsüngrem o-ji angashia scientist baji jungjunga dang jidakadok.
Asen oshi aser zülu ya yanglushitsü asoshi nübür temeteter aika lir, item denji nübüri paper osang ajanga pei-pei- metetba, ya jungdisü (?) ta shidangdagi. Saka iba mapa nung nokdaka alir aser nübur ajak Tsüngrembo masü, anungji ajak ola angadanger ang asen oshi aser o zülu ya osep nung inokdi aser shitakji jembia zülutepdi ta ayongzüker. Kanga pelar.