Oshi ka ji mesüdar ta masü, oshi ka mesüba ajanga ajangzükdar

~ Talitemjen Imchen.

Küm tepiyong Ak ka jepa/mesüa arur, iba Ak ji yoktetra Ak mesüba tajangzük bilemdang, mesüyonga aruba tebelem samar. Saka wara arur küm tom nung Ak ji süadokra, tajangzük nung rangloker mesüa aruba bilemdang, tebelem tali meteter. Yamaji tanü oshi ya asenoki mesür ama bilemra kanga belemtsü. Saka oshi ainba ji kodang shisadangdir jangratemtsü lir. Aser oshi kaji taküm asünung aintsü nüngdaker aser ajaki shilem agia tangittsü nüngdaker.
Aikati Aori jembiba ji Chunglir oshi jembir ta bilemer. Saka kodang asangsang nungji reprangdir iba ya Chungli oshi masü, Aor ajaki meranga jembiba nungi jembitetba oshi ka lir. Ainer kibong kaji shir yimi oa lidir par yimer oshi jembia tanurji inteter. Aser tang asenoki jembiba aser zülur azüngba zülumen ya yim shinga dena putepa mali. Tatishitsü agi, Longsa nungeri jembibaji ajakbo tangari mangateter. Ungmai Mongsen oshi aika inoker jembir. Langpangkong aser Asetkongi jembiba nung S kangabo mesapur, H ang sapur. Changki oshi tongtipangsa yim pezüi jembia aliba ji aikati mangazükteter. Mesüra Chungtia, Mangmetong nungeri jembibaji aikati mangateter. Yamaji yim shinga dena putepa mali. Saka tang koba osang kaket asenoki azünger mesüra teloktesen nung jembir, ibaibo ajaki angateter aser züluteter. Aor ajaki angateta jembiba aser zülutetba dangji AO OSHI ta ajar.
Olong tasen ka yanglu dang ajak asoshi pei pei shisatsüi melaa melaa agizüker inoktetba olongji nüngdaker. Iba jagi oshi ka ji melaa angazüktet. Olong tasen ka mesüra tetibo mamshiba olong ka inoker amshidangji mezüngbo tai ama bilemer. Saka olong agizükyimji sademer/junger lira pei shiametetba nung ji metetlok (update) tsüla/asütsüla. Temalen English nung Cover zülubaji nibo Ao oshi nung PU ta aginer. PU ya ojang anati akümba olong ka lir. Aser olong kwika nung pu inoker jembir, iba jagi English olong cover melena ji jembir. Tatishitsü agi, tepu (teeth, tepang cover sür aliba), tepu (father, tanur ka kechi nungsa tebilemtsü/tapok küma nüngdaker cover asüba), kinüngpu (ki indang ajak nung pai cover asür), süpu (sü temang nung apuloker/cover asür), Grandfather ya Ao oshi nung anasü agi angatettsü akok. Opu (tsürabur malidang semchir cover sür atar), Opu (tsürabur otsü mesüra onük asüngdangdang cover sütsür). Yamaji Book Cover dang ya KAKET TEMEKÜTTSÜ ta masü KAKET PU taang amshi tajungba aser zülu jia tatsüba lir.
Laishiba nung English agi PROVERB dang APIJEMTSÜ SHIN ta meyip aser amshia arur. Shibai meyiptetar kanga junger. Iba nung nibo techi ka inlokner. Apijemtsü shin ta masü APIJEMO/APIJEM O ta melenshir amshi nung kang ajungtsü. Apijemo tetezü, kechi olong mesüra kechi olen apijemer jembir/zülur iba dang ji ajatsü junger.
Medemer Kaket zülur P. Alem Jamiri koba AO OSHI OJANGRÜ ta kaket zülur kanga sapua züngtepdar, kanga junger. Iba medentep olong OJANGRÜ ranglokji nibo tera merükshiner. Ojangrü ratetji, yong ka nung telong küma rülokba nungi agizüktsü akok. Koba tetezü, ojang (letter)i telong junga aküm. Ojangji kodang telong kümer/amshidir olong (word) ta ajar. Aser English agi HOMONYMS ta kodang südir, Ao oshi nung olongbo ka dang saka nüngja balala adokba dang ajar. Aseni külemi/sako ta ajaba olong nung “REP” ta amshir. Tatishitsü agi, tenüng sako asünung NÜNGREP ta ajar. Tanur ana külemi aso nung JAKREP ta ajar. Anungji Homonyms nüngja dangji Ao oshi nung ji OJANGRÜ ta masü OLONGREP taang nibo janer. Koba tetezü Olong külemi/sako (olongbo ka dang saka nüngjabo aika adokteter). Ano maneni Ao oshi nung HOMONYMS kaket züluriang, Homonyms taretji metet asünung ya ser kaketji tuluba aser tajungba merükshidangji, pai mulung nungbo iba olong ya bilemtetdaktsüner.