Oshi tsütsü shisadangtsü olen kar

~ P. Renthy Jamir.

Osang zülur kari ASLB-i oshi tsütsü Tensenyim melenshijen melenshiba ya majung ta zülu. Kechiyong iba melenshiba kar nungbo tetsüdaktsü adoker. Tamalen Long ta amshi tang Lung ta amshir. Joko Long nungi Lung ta melenba ajanga Aor yim tenüng Longsa, Longjang, Longpa yamala aika den ano kidong tenünga aika Longkumer, Longchar melentsüsa akümer. Tang ASLB-i Long ta asütsü asü putu aika amshia aruba tenüngtemji Lung ta melentsü. Ano tamalen Chungliyimti ta amshi ano Chongliyimti ta ken ano Jongliyimti ta amshi tang Jungliyimti ta amshir. Aser asenok Aor aliba mapang nungi tang Sangtemer telidak parnok yim Chungliyimti ta amshir. Anungji Sangtam limai Jungliyimti kong lir ta bushiyonga ao nung parnoki memetettsü yangia ken shisadangtsü adoker. Ano Aor yim tenüng kidong tenüng melenyonga Lotha yim Longsa (Longtesa) memelenshitettsü ta bilemer. Long- Longzür, telonglong, etc.
Ano nisung kari Ao oshi nung M.A. azünger kar ali ama jembir, zülur. Tang B.A. nung Ao oshi metenzük nung M.A. azünger kong nungi adoktsü, ano tazüngtsü kaket mezülu. Ao oshi nung M.A. renemer ano küm ishikabo malitsü ama bilemer. Khuli kar, tang Ao oshi P.U. Fazl Ali College nung tenzüka agir yangji kari B.A. Hons ngua tur M.A. nung Ao oshiji renem nung dang M.A. ta ajatsü. Aser tanü putu nung science aser commerce züngner tesa ano Arts azüngertema tera tokolok ajungerbo Economic, English subject amala agitsü teimba rakteper. Anungji techirar aikati Ao oshi ya Major subject ka ama magitsü südi ta bilemer. Aser asenpanger sen makar tokolok tajung masür kari passed süa post adok nunga tang yimya yagibo item nemji mapaji magütsütsü. Tazüngtsü Text Book Selection nungasüng pei kinunger adianui züluba-ang shimteta agiba teraksa putu ka nung asenok alir. Anungji item tia nükla nung rangloker asadangba ajanga Ao oshi nung M.A. wala yaktasabo taluposa madoktsü ama shisadanger. Ibajagi Ao oshi tsütsü inyakyim tasü meiti alitsü ta-a masü.
Tang Aor shisaluyim aser literature tsütsü temetetba nung joko tatembanglak (zenith) tongogo ta jembiba mapang ka nung lenir aikati akidang Dr. Clark mapang pai Ao osep ojang 11900 bendena zülu ano asen kidangsür Lotha nunger osep ojang Lakh ka sür meyi terok. Saka Ao oshi takar ta jembiba ojang meyi tenet ya koda ta züluba ngua Arok osep nung mamsemba entokenra tokshitoklem bushidangogo. Aser bushitetba tongtibangtem karbo osang kaket nung züluogo. Ano yamala shimashi tashionshiba Laishiba nunga karbo ali mali temong yatettsü merangdangogo. Kechiyong alima nung oshi tematiba English literature ya tanga shisatsütem bendenba ajak meyoktepba dang nungi Laishiba (Holy Bible) nungi agizükba tulutiba ta ashir. Laishiba ya kakettem yangluba kaket ya literature koba agi literature ajak aramesodaktsür. “The Bible has been a greater influence on English Literature than all other forces put together”. “The Bible is a book-making book”, “It is a literature which provokes literature.”
Laishiba nung züujang 3566480 aser ojang 810697 lir. Item ojang nung Arok osep nung mamsemba ali mali metettsü medemdanga bushidangtsü tapu 1189 tekong 31177 aliba nungi kar mezüngbuba tetenzükba lipok tapu ka nung ojang 13 ano tatembangba. J. Adok tapu 22 nung ojang 14 ta liasü. Ano tapu ka dang aliba tejen Lai obadia nung ojang 11 tasen Lai Filemon nung ojang 10 Yihuda shidi nung ojang 10 ta mamsemi lir. Ano tekong ishiba T. Ken 117 nung ojang ka ano tekong asemasem dang aliba T.Ken 131, 133, 134 nunga ojang kaka. Tatem nung tekong tatsütiba Yisui ajeb yangjia ka Yisu mali. Aser Ao osep nung Yisuji alitsüla, Lijaba lir Lungkitsüngba lir Longkongla, Ongangla ta lir aser item ajak ya alitsüla. Süra ojang 810697 nungjagi ano aika mamsemi alitsü ta bilemer. Oda Aor nisung tenüng balala meyirijang ka alinunga yangji ojang kwika agitettsü nisung tenüng shia ojang anana karbo asem kar nungbo pezü ta lir. Tatishitsü, Imnakilep, yim, ana, ki, Lepok. Tang Aor tenüng talangtibaji Temjen Imna Along Longkumer lir. Lai nung Isaia 8-3 nung lir. Ano süngdong tenüng ai tapu balala shiruru, ozü ango nüngjakoja züngermezüngma lir. Talakba agi Aam tenünga ter tema lir, kongrü tenünga metsü jungnüa lir. Arok osep züludang süngdong shirurui (arem kiset) ozü ango oda allu tenüng tashi ajak benden, saka mapang aritepba agi itemji abensa-a matoktet.
Anungji tang aser tarutsü tia asadanga shisadanger Aor lenir shirnokisa Ao oshi osep ojang agi tenük masüng ano tanga metokmeperi aliba temulung runga bilemba tuteta shisa lemsateper pela-a agizüktsüla. Ibai arok wadang lir. Aser ojang mamsemba tanga metokmeperiba ajak bendenloka metongshiteper tarutsü lanur putu asoshi tajungba inyakteta yutsütsü nükla nung rangloker asen Ao oshi tsütsü shidangtsü iba olen ajanga ayongzüker.