Oshioben aser sobaliba tsütsü tanü asen Aor tia

~ S. T. Yapang Lkr.

Ao oshi nung Arok Osep ka asoshi Ao Senden Literature Board (ASLB) ajanga achaayanga küm aika meranga inyaker, ano nüburtem danga junger majung shidangtsü maongka agütsüba nungi aikati melenshitsüla ta ajitetbatem lemsatepa arur taküm adoktetogo. Nibo kenü khen lapoka ojang kar züngdangba dak alaka kaket ajak züngshitsüsa mapang magütsütet nungji tangbo junger majung ta mashir, saka inyakeri pei akokba tajungtiba agi adoker alitsü ta imlar. Ni kenü khen lapoka züngdangdang item yabo Ao o züngtetertemi aser Ao oshi meimertemi metata alitsü tim ta angatetba kar agiteta lemsateper, ibai tai putepba ka ama masü, saka tarutsü ASLB nung inyaktsü pur mesüra ano Osep tajungba tuluba küma adokshitsü idangji meteta alitsü asoshi lemsateperba dang;
Arok Osep tapak 60 ‘Hokum- ozüng, teinyaktsü maparen agütsüba’ :
Tapak 121 nung ‘Mekhala- sübeti, tetsür teberem sü’ ta agütsüa lir.
Parnok Arok Osep yanglur nisung ti, ano zülu nung agütsürtem dang pelaba kaket tetenzüklen nisung terasem dang shia lir, iba den anogodok osangkaket Tir Yimyim o Ao Milen aser ita shia adokba Lenjeter, itemla nungi teyari ngua iba Osep adok ta shia lir, item Arok Osep zülur aser Osep asoshi ojangtem bendena zülu nung agütsürtem yimtem mesüra parnok aliba tesem nung ‘Hokum’ ‘Mekhala’ ta mejembir anosa Tir Yimyim, Ao Milen aser Lenjeter asemprongla nung sübeti dang mekhala ta aser tzüngozüng/ozüng/temzüng dang ‘Hokum’ ta kodanga zülua mangu aser parnok yimozülur yimtem nunga jembir. Anungji asen oshi meinokma kar nung tangar oshibo asen Ao Osep nung mezüluokyonga ajungtsü, kechiyong Ao samadaktsütsüba asoshi masü Ao tajungba kümdaktsütsü asoshi nenok nübu aser rongsen jenti laluogo aser Osep yaa Ao tajungba kümdaktsütsü asoshi dang adok ta amanger. Ano yamala aika alitsü akok, saka item ajakji tai bushir masüji mebushir.
Tang ASLB ajanga agiba Arangtet Tatidang mesüra kaketreju nung kaketshirtemi “Tetsütem anogo nung ni esap südanger hokum mesüaka ojala nem mekhala tajung ka alitsü” ta zülu nung aji tai masüja to, kechiyong ASLB ajanga adoba dang masü Ao Senden-ia iba kaket adoktsü temelaba agütsüa lir. Iba den kasa ‘Khel’ ta asen Aor yimtemi amshiba angur, ner yimeri Mopu mesüra Kiyong ta memetet asü koda? Asü iba jaki meperir amai bilemer? ‘Khel’ ya arur ano küm ishika dang, süra ibaji marudang koma jembia liasüar ner yimdak taintem dang asüngdang nung metettsü.
Arok Osep nung tetezü tai rateta agütsüba ojangtem rongnung Oshioben nung mongin P. Renthy Jamir ajanga Tir Yimyim Rongchii 21 aser 22 anogo Olemsabang nung agütsüba ajak to shitak lir, saka ni ka dang rasa shinür, kechiyong shirnok English meteta liaka Ao oshi mashi sürnung shia lir ta sayunüa pei dang ajungba tetezü kechiar memetet ratettsü meranger; item purji kanga mangmangkoratsü asüba agi ka rasa ashirba dang, ‘Akpurmeshi’ tetezü tanutsür tanurburi angatettsü tatsüba agi yamai agütsür;
Akpu-r-meshi = Ak chi-asutsü-mapang shitak :
Lanurtemi ya angatetang ak chiyungtsü aser ak chipu dang ‘Ak pu’ ta dang ajar, ‘Akpu ayimi aor’ tetezü ‘Ak chiyungtsü bushii aorba’. Akpuji kodanga mesorur, saka ‘tarü’ dang ‘arür’ aji o jembidang tatsüba nung ür/r ta dang adoker, ‘meshi’ tetezü ‘mapang shitak’. Ao oshi dang shia lira item amala tilateri atema tangar ki sema tetezü asüngdangi aotsü menüngdaktsü, anungji Ao oshi tama shir dang tetezü ratettsü merangtsü junger. Akpurmeshi ya ak ajebba (Ak nem chi agütsüba) mapang masü. Akpu artsü asoshi alu nungi nübang atsüa bener jiliasa tugu aser tanüa yamaji kasa dang. Akpuji arür tatsüka lir ajebtsü (chiyungdaktsütsü).
Tasuba/Soruchiokba nung asen Aori jembiba balala yamai lir, yamai asen oshiji asen yari lenmang aisü nung takar, saka shirnoki English metet, saka Ao mashi parnok asoshi Ao oshiji sensaker;
1. Ak chi aser sotzü süra arür
2. Manü/Pongalashi amala süra ameter
3. Shiküb, azüngki metar
4. Prok (grhai) nung menti angor (totzü meinok pokdaktsüba)
5. Prok nung am asanger/arur
6. Tzü molur.
7. Langtem molutoker.
8. Chi sorur.
9. Pongsen asener.
10. Aon lemshir/tonglemer (Aon sor temokong liasüba tatsük kümdaktsüba)
11. Chi azüshir (Chi sorur mokonga lia, mimung nung ano talem kümdaktsüba)
Tekalen ashi ama asen oshiji aluyimba, sobaliba, sütakmentak, kisüjensü, külemkeja aser anempong maparen itemla nungji tangar aika dang kanga agia takarba lir, saka tanü asüng bushitetba oset tasen mesüra shisaluyimba nungbo asenok kangara maka, kechiyong asenoki itemji benshia maru nungji asen oshi nung mali, aji asoshi asenok shisamebululi, kechiyong asen o nung alibaa tangar o nung mali aika lir, saka parnokia shisamebulur.
Asenok purapuji tali, ojang ka shitak amshia alinung ano iba jaki tenük mesüngi perpa perepa oa puraloknür, saka o taruk ka asüngdangra ajibo memetet, ibayongji asen Ao ojangtem ya temelenshi dang melenshir ashi tebendenlokba kangara maka. Tawatanü Arogo sentong ka nung ‘Sentong telatekümer’ ta zülua liasü, kechiyong tangar dang pei temetetba ta sünüba agi asüng, saka tetezüji kecha memetet aser item dangji oshioben kar asüngdang nung kata langzütettsüba masü. ‘Sentong telatekümer’ tetezü junga madoktettsü südi, saka ‘telateküm ka mali’ ta jembir tetezü nisung küma kukakulema mali ta ashirba, ano ‘Telateküm süa liang’ ta ashir tetezü ‘tajung majung meteta nisung küma liang’ ta ashirba, anosa lendong mapang ‘telateküm süa liang’ ta shira ibaji ‘Tsükchir aru maru ola osüng angadanga, kümküma, ladanglara liang’ ta ashirba. Ajisüaka aji yim shiai balala rasa ashitsü akok. Sentong lenir/ sentong ketdangsür ta asü nung iba jaki mabensaba kechisa ali? Au, Ao mashirtem atemabo iba jaki meperi aika putettsü, saka shiri Ao shia ali item pur jaki Sentong lenir/ketdangsür ta lirumdema amshia aruba jaki ajak angajema lir. Asen Ao oshi nung tebilemtsü tulutibaji Ao mashir rogoi Ao melenshinüba aser tangar dang tali shia lir ta sayunüa shitak lirumdema zülua/jembia aliba nung pei ashiba/metetba shisangnüba ajanga oshi tali benjaba dangashi, asen Ao oshiji ojang ishika agi züluteter aser ka sülen kechi ojang arutsü aji temetetdang asünungji Alima nung oshi temelatiba süla, iba indangji ni yaküm lemsatepogo tanaben melepshir.
Kasa Arok Osep tapak 176 nung poksak, poksen, poksüng, poktzütem, pokyim ta yamala ishika agütsüa lir, ya Ao Senden Literature Board tetuyuba anema lir, kechiyong parnoki adokba kaket Tensemyim-1 nung ‘tebok’ ta amshitsü tuyua lir, aser tekalen shia aliba ojang ajakji ‘tebok’ nungi jakzükba ojangtem lir. Tang aser tarutsü nunga ASLB ajanga lemteta akaba ojangtem nungji Osep yanglur mesüra ASLB züngsema süang ajaki anidaktsü tim. Maneni tapak 70 nung ‘jojo-ozü tapu ka’ aser tapak 71 nunga ‘juju-ozü tapu ka’ ta shia lir, yangji o agitsü asü u agitsü itemji medemshir dang osep nungji inoktsü tim liasü. Osep kaji asayamenüba kaket masü, pur bendanger aser Ao lanur Ao mashir rogo aikati züngdangtsü idangji akokba tashi tajungtiba agi adoka alitsüla. Joko tang adoka aliba shitoka indoker tajungba nung adokang asütsü masüji tarutsü nung iba kaket tajungba, tuluba küma adokshira idangjibo ASLB ajanga lemtetba ojangtem 100% amshia adoktsü imlar.
Asenok züzü alidang Kohima nung school tajung kar nungbo joko par ali kibur oshi ozüngsüa agi tenzükogo, asen Aor Ao mashi lia ano bedanglima alir iba den par oshi agitsü anungji tanur jaki kechi oshi ashitsü/jembitsü amai? Nibo ashir oda yamala school nungi tekaraba nung asenok chirnurtem anizüka tanga school tajung aika lir asünungji item nungji züngdaktsüdi. Kechiyong kaketshisatsü kija agi alima nung alitsü makok.
Tanüasüng Kaketreju ajak nung ama küm nung khen anaben tanurtem pei kin sobaliba sobutsü sobur arutsü anogo lemteta yur benjongteper, idangji kin balala tsüngda sobaliba angazükteper, ibala mapang Junglitsür aikati kolang temesüng inoker aruba angur, tanur mesüra tsüraburi memtetyongkala ner yimdak nungi sobaliba meteter kata mali no? Mesüra yimdeni lokti, sentepdenji amala nung küm nung khen danga Junglitsür kolang tanak aser Mongsentsür temesüng tasa inoker ta meshiteter no?.
Ano temetettsü tongtibang rongnung item yaa ka lir; asen Aori agiba tetsürtem tebursang kidong inoka züluba ya shir metomera mapa ka ta bilemer, item ya temesüng nübu dang ajizükba, saka asen Aorbo kidong kasa ana melembur. Kasa Naga kin asüyonga kidong kasa lembuba kina lir parnok asoshi aji kecha mali, saka asenokbo tatishitsü agi ni tzümatsür ka agira la tenüng nung Longkumer ta inoksema zülura kidong aliba ama akümer, shitakba agi asen sobaliba ama lai tebu ka ayimtsü, aji ni Longkumer asünungji Jamir mesüra Pongen amala ka dang tebuji ayimja to, süra kodasür lai Longkumer ta zülutsü? Ya tetamatsü mapa masü na?.
Ano kasa yamala mesükba tangar dang ajizükba, asen sobaliba den meputepba kaji pei tebu tenüng mesüra pei tenüng tetenzük inoka züluba yaa tangar dang ajizükba dang, ajisüaka asen sobaliba nung tanur tama zülur tebu tenüng zülutsü mapet, tambulen nungi mesüra tebu tenüng zülur tanurji zülutsü. Toshi Jamir jala Narola süra Narola T Jamir ta amshir, iba melena T. Narola Jamir ta zülutsüji asen sobaliba den apetba ka, saka kari mapet ta bilemra pa/lai kecha meinoki pei tenüngji zülutsü tim ta bilemer. Yangi aibelenyonga senchimenjibo makatsü südi, kechiyong ya asenok tangar dang ajizüka benshirba dang, saka asen sobaliba den putepa aotsüji tim ta bilema lemsateper.