‘Oshioben Tamendakdak Kimung’ kaket sayaogo

Mokokchung, July 7 (TYO): “Oshioben Tamendakdak Kimung” (Foundation in Linguistics) onük dak ajemdaker Mongulbarnü nungi tenzüka anogo asemnü atema training sentong ka Fazl Ali College Mokokchung nung kadaki. Iba training ya Ao Senden Literature Board (ASLB), Fazl Ali College aser Nagaland University külem ser ayongzük.
Iba sentong nung shisalen sayurji Dr. Pangersenla Walling (Asst. Prof. NU Meriema) aser Dr. Imlienla Imchen (Asst. Prof. SCERT Kohima) tena lir. Shisalen sayur ajanga “Oshioben Tamendakdak kimung” dak sentakba indang onük balala nung tesayuba agütsüdaki. Iba sentong nung FAC nung Ao agir kaketshirtem aser Arangtet Tatidang agütsürtem dendaki.
Tanep iba training tetenzük sentong nung Dr. Pangersenla aser Dr. Imlienla Imchen nati züluba “Oshioben Tamentakdak Kimung” (Foundation in Linguistics) ta ser kaket ka FAC Principal, Wt. Chubayanglai sayatsüogo.
Wt. Chubalai iba kaket sayatsüba mapang, oshi ka ajanga dang kin ka maitsü (identity) jangjadaktsür aser oshi ajanga temeim aser telungjem bener arutsür ta ashi. Aji oda, pei tetsü oshi mesamadaktsütsü asoshi asenok ajaki tali keta sena jembitsüla aser angazüktsü jangratsüla ta laisa tayongzükba agütsü.
“Oshioben Tamentakdak Kimung” kaket nung ya ‘Oshi Nükmen’ dak sentakba indang tenük telen, ‘Phonetics & Phonology’ dak sentakba tenük telen, ‘Ojangmen (Morphology)’ dak sentakba tenük telen, ‘Orensenlu (Syntax)’ aser iba dak sentakba tenük telen, ‘Lexicography’ aser ‘Oshi Bushiba Tasa (research methodology in linguistics)’ item onüktem indang zülua lir.
Naga nunger rongnung iba amala kaket yabo Ao oshi nung mezüngbuba adoker. Iba kaket zülua adoktetba ya Ao kin kaketkeno aser oshioben renlokba nung tapak tasen ka asütsü. Iba kaket ya degree level nung Ao text book ka ama amshitsü. Talineri iba kaketji ASLB office nung senpak 200/- agi angutsü.
Tanü iba senden nung ASLB tezülur Wb. Temjen Tzüdir aser ASLB züngsem Dr. Temjen tenaia kaketshirtem dang Ao oshi jangra azüngtsü asoshi tayongzükba agütsü. Rev. Lima Lemtur ajanga iba kaket meshitettsü.