Oshioben tsütsü kü tangatetba kar

– Talitemjen Imchen.

Ao oshioben (literature) tajungba asütsü atema, temetonglen (correction) aikati pei pei aginüba züluteper. Aser aji Ao oshi nung asen kibur, temeden idakji lir ta bilema tajungtiba kümdaktsünüyong lemsateper. Saka kodang asen oshi ya samar tangar oshi nung tamendakdak küma jembitsüsa kümdir, iba mapang jibo aseni achitetaka parnok dang asüngdangtsüsa akümtsü mesüra kiburi asen artsütsü.
Aor oshioben ya ken dang agir yutsütsüba ka masü. Ano aikati molunger ta sür amshiba ka masü. Saka olong taoyim aser tetenzükyim ji junga alitsüla. Tsüngküm shiruru balalai asaba ajanga tsükrem kabo metetdaktsür ta kenteta jembiba ama, mashi kati osang kaket nung zülutsüba ajanga tsükrem kabo angazüker. Anungji ajaki ocet ka züluba ajanga mesüra jembiba ajanga, onük ka ji tabensabensa akümer aser tejakleni odar ta angateter. Ao oshioben tsütsü apongmen/tamendakdak ji reprangdangra, Missionary E.W Dr. Clark aser kinüngtsü dang kanga pelatsü lir. Tanü alima ajonga nung zülumen tapu aika liaka, ajaki sapua amshiba Roman zülumen (script) nung Ao oshi yanglusemtsüba ji tajangzük tulu lir. Süngzü tali agi naipangra, süngdong karaa mainba ama, tanga oshi Hindi, Assamise etc…. parnok pei pei zülumen aliba ajanga, asenok dang nungi Roman aser English zülutsü tasakba akümer. Yamaji asenokbo pei tetsü oshi ji Roman zülumen nung yanglur aka nung, tangar dang nungi asen nisungi English angazüktsü temelaba akümer.
ASLBi tawa convocation sentong alidang, kulio (certificate) nung nüngyu ta olong tasen küma amshir aliba ji, nibo nüngo tasa amshi tajungba ta bilemer. Nüngyu tetezü tenüng ayu nungi bener aru südi? Kodang nüngyu ta olong ji amshidir, NÜNGYU AYU ta oren ji arutsü aser olong ana ji nüngrep akümer. Ano nüngja/olong ji ayutsüba dang ta angateter. Saka NÜNGO OSET ajak ji ayutsüba dangbo masü ta metetdi. Kar nüngo süa amshir, kar nüngo süa agir, kar nüngo süa azünger aser kar nüngo süa ayur. Kodang nüngyu ta olong ji agidir, oren ka nung dang amshiteter. Asembo meperir. Tanüngbatem atema olong tasen bener arudangji, olong ka tetezü ji tebenja akümtsü. Aser nüngja ji taret masü pongpaa kümdaktsür.
Yim karibo NEKONG ta jembir, koba tetezü ne indang mesüra oset ka jagi, ani akonger ama teti metetdaktsür (osang agüjaa bilemtetdaktsü). Olong ji nekong jiang tabensaba lir. Saka oshi temelaba tsütsü nungi yanglutsü atema nüngo ji kanga tapet lir. O agi atemba kar olong yamai amshi nung jungdisü:- Kulio (certificate), Nüngo (Souvenir), Kongkikeno (Music), Kaketkeno (Education), [(Education-shisaliok) ta amshiba nungi tajungba. Shisaliok ya comprehension ta amshitsü jungdisü. Tatishitsü shisaliok tendang (comprehension test)].
Kopangtsüng, temko, konang aser ko (hair) item olongtem züludang lirumedema “o” amshitsü junger. CHIEF GUEST Ao oshi nung meyiper züludang, Tongdi Tesemdanger ta masü Tongdi Jaoker/Tongdi Tejaoker ta amshitsü junger.
ASLBi September 20 2016 osang kaket nung zülusü (spelling) teti amshiba olongtem kar melenshitsüba nung olong ka agiteter kü tangatetba ka lemsateper. President dang Ao oshi nung “Dir” ta amshitsü apitetba ya shibai tamasa bener aruar ni memetet. Saka Ao oshi nung meyipa bener arur jagi, apijema bilemer bener aru südi ta tamang akar. Aser olasü züluyim (spelling writing) nung D agi tenzüka amshitsü yanglusemba ji kanga junger. Kechiaser parnok mapang Ao oshi nung züngyazüngko, ti (8) aser tir (80) adoktsü olasü yangluba ji kangasa azüki tua yanglu aser tanü tashi olasü ji azüklen amshidaki.
President dang Ao o agi Dir ta amshia aruaka, netsüng kari lirumemedemi Tir aser Dir ta amshitsü tenzük. Tanü tashi nung shirnoki Tir ta amshia arudar, item jiang ASLBi metongshitsütsü nüngdaka lir ta nibo bilem. Saka kechi tangatetba agi ASLB ang melenshitsüsa akümar nibo süngmanga bilemer. Dir nungi Tir ta melenshitsüsa ASLB züluyim nung akümba ji, alima dang angatetdaktsü nungbo angateta rajemtsü imlar. Dir nüngja (noun) küma bener aruyim ji, tatishitsü agi:-, imladir, inyakdir, jembidir, kümzükdir, nungitdir, odir, senzüdir, yaridir etc. item nungi lir ta bilemer. Külen tsütsü reprangdangra, yim kari horn dang ya dei ajar. Ano shiruru rongnung tambusang/tantsüla aser tulutiba danga deila/dei ta ajar. Item olong ajak ji “D” ojangi awapanga lir.
Asen oshi renloka aoba mapang ka, nia D aser T sendakba olong kar nungi lirumedema bener aruner. Tang asenoki lirumedema amshia aruba ji lokti, jenti, senti, tulutiba aser yimti etc ta amshia arudagi. Item olongtem nung “ti” ta aliba ji “Di” ta melenshia amshitsü junger. Lokdi tetezü telok rongnung tuluba. Jendi tetezü tsük aika mesüra jen rongnung tuluba. Sendi tetezü tasen (new) rongnung tuluba. Tuludiba tetezü tulu rongnung deiba. Yimdi tetezü yim rongnung tuluba. Engraji nung “Biggest” olong ji Ao oshi agi meyipdang D agi tenzüktsü tim ji lir. Temalen olong meyipzüka yanglurtemi, olong nung züluyim kanga tobur junga yanglusemba kar. Tatishitsü agi: – inyakdi, mendendi, merükshidi, renemdi, tebudi, yangludi.