Oshioben & Zülumen Jangjashiyim sentong kaoko

Dimapur, July 24 (TYO) : Ao Baptist Arogo Diphupar nung Purana Bazar nungi Medzipema tsüngda aliba Ao Arogotem nungi nisung 200 shi arogo 14 nungi sendena July 24, 2015 nü Oshioben aser Zülumen Jangjashiyim Sentong kanga tajangzük kaa mongogo.
Iba sentong nung Ao Senden Literature Board (ASLB) nungi takotet tesayur Prof. Lanunungsang, Dr Pangersenla Walling, Rev. C. Walu Walling aser Temjen Tzüdir, parnok pezü arua asen Aori aibelena amshiba zülumen melenshitsüyim aika sayuogo. Iba den asen oshioben, kenozülu, kaketkeno renlokba tejakleni aotsü asoshi tesayuba tajung aika agütsüogo. Iba mapa asoshi arogopurtemi ASLB dang kangasa pelar ta Ao Baptist Arogo Diphupar-i sangdong ka ajanga metetdaktsü.
Oshiji kin ka asoshi jangjayak lir, anungji senso shiai pei oshiji jembitsü, zülutsü aser atentsü ashitsüla. Reprangang, tanü asen putui iba senti senmang masenmatoi benshi nung asen jangjayak samaa odagi. Yongji asen meküta aliba kintemi asenok jenjang luja bilemer, tetlatetshir aser mezüngmeshir. Iba tia aser jenjangji ngua ASLB nung lenirtemi anibelem, nüken aten jenti arema oshioben aser zülumen jangjashiyim nung meyipshishi ka bener aruogo. Saka ya tetenzüker ang asünung senso shiai peii akoktsübo tata shilem ama inyaktsü ayongzüker, ta sangdong nungsa shia lir.
Iba sentong nung lenirtem ajaki kanga dang bangpet süa jembiba kaji tanü asen oshioben aser zülumen tejakleni aotsü asoshi sabang tajungtibaji Arogo ta lemsatepogo. Atangji, aji kanga dang shitak lir kechiaser tambusang nungi tanutsütila tashi shilem agitsü jenjang angudakji Arogo ya lir. Anungji, Ao arogotem ajaki oshioben, kenozülu aser kaketkeno renlokba nung nendaka shilem agidi ta Ao Baptist Arogo Diphupar-isa sangdong ajanga ayongzükogo.