Oting nung nisung tepseter anema ken o jembitsü temelaba mangur

Dimapur, Rongchii/April 13 (TYO): Sepaitemi December 5, 2021 nü Oting nung civilian tem tepsetba dak sendakba nung Nagaland Police ajanga Special Investigation Team (SIT) ka tenteta liasü. SIT yagi bushisüngdangba maparen tembangba sülen March 24, 2022 nü Department of Military Affairs, Ministry of Defence, Government of India dang iba lendong nung tai tonglokja alirtem asoshi Sanction for Prosecution meshia liasü, ta Nagaland Police sangdong ka ajanga ashi.

Bushisüngdangba maparen tembangba sülen mela aliba ama temerenshi agütsütsü asoshi temelaba monguaka tai tonglokja alirtem anema ken o Hon’ble District and Session Court, Mon nung May 30, 2022 nü benoka liasü. Section 197 2) Cr.PC aser Armed Forces Special Powers Act (AFSPA) indang Section 6 kübok security forces tem duty inyakba mapang inyaksangshiba anema okadak ken o jembi tenzüktsü asoshi Government of India nungi temelaba nüngdaker.

Kasa mapang tai tonglokja aliba Security Forces züngsemtem kinungtsü temi iba ken o mejembi ata alitsü asoshi Hon’ble Supreme Court dang asüngdanga liasü, ta sangdong ajanga ashi.

Yamaji India nung tematiba court ajanga iba ken o nung talila inyaksangshi anena atatsü totuyuba agütsü.

Iba mapang Department of Military Affairs, Ministry of Defence, Government of India mimhoa tai tonglokja alir sepai 30 prong atema Sanction for Prosecution magütsüteter, ta osang agütsü.

Ano ozüng nung shia aliba ama Prosecution Sanction magütsüba osang ya State Crime Cell Police Station aser SIT ajanga Hon’ble Court of District & Session Judge, Mon nem agütsüogo, ta sangdong ajangasa ashi.