Otsü melenba

Yimten yimsüsüba maparen nung aikati tangar teloki inyaka aruba mapatem maginür, anungji mapangi dang bentsür arura, tajung majung kecha mali, tangar teloki inyaka aruba sentong aser tenüng dena melener amshinür. Aji oda, linük nung BJP teloki aniba government kümli Congress teloki yimsü asü tepiyong linük asoshi terenlok sentongtem lemtetba inyakba telok Planning Commission agi NITI Aayog ( National Institution for Transforming India)  melener inyak tenzükba nungi tenzüka temelenshi aika bener aruogo. Ajisüaka, temelenshitemji teimbaka terenlok mapatem agi alima tajungba küma melenshidaktsüba temelenshi masü saka yimti aser tesem balala tenüngang aika melenshia aoba angur. Atangji, India nung tongtibang tesemtem aika tangar bendangertemi mesemteta jatsüba tenüng asünungji, yimti tenüng aika liso oshi nung masü saka bendanger oshi tsütsü atsünga ajabatem lir. Ibayongji, India nüchiso ngur sülen nungi tang tashi yimti tenüng aika melenyonga aruba angur. Item rongnungji, Cawnpore dang Kanpur, Culcatta dang Kolkata, Madras dang Chennai ase Bombay dang Mumbai ta lisopurtem oshi aser otsü dak apet yimti tenüngtem aika melenshia aruogo. Aji oda, ano tanga, talisa, Uttar Pradesh nungbo Yogi Adityanath-i aniba BJP government arur külen nüngtugu railway lenjem ka tenüng agi Mughalsarai ta jaa aruba Jan Sangh telok nung lenir Deen Dayal Upadhyaya tenüng agi melentsüogo. BJP tekok ya Jan Sangh telok nungi akümba lir. Ano, taoba ita nungang UP cabinet-i Allahabad ta ajaba tenüng ya Prayagraj ta melentsü telemtetba agiogo. Anosa, parnoki Ayodhya yimti aliba district tenüng Faizabad agi Ayodhya district ta melentsü mulungtetogo. Ibaji dang masü saka ano Gujarat nunga Ahmedabad ta ajaba yimti tenüng ya Karnavati ta melentsü bilemdagi. Atangji, yimti aser tesem tenüng melenbaji tanü tasen masü, saka tamalen tenüng melenba tangatetba aser nükjidong o tanü tenüng melenba tangatetba aser nükjidong na balala angatetter. Akhidang, yimti tenüngtem melenbaji bendanger oshi atsünga ajaba agi pei tetsü tasoli dak peta pei oshi tsütsü atsünga janüba agi melena liasü. Ajisüaka, tanü yimtitem tenüng melenba yabo pei tetsü tasoli dak aketba otsü aser oshi jangjatsü atema masü saka Muslim tenüng maginüba agi melener. Linük mesüra yimti tenüng ajaba shia nung ya tatalokba otsü aser tetezü keta lir. Aji oda, Allahabad tenüng ajaba nungji India nung Muslim nunger chubatemi yimsü süa aruba mapang Mughal yimli nung Akbar chuba Tulusang merenba mapang nungi aruba otsü aser senmang aika sendaka lir. Atangji, nisung asünungji, tangartemi yimsüsüba mesüra mapa tajung inyaka toktsübaji maginütsüa akok, saka alima ya teti yimten telok ka meyong mesüra kibong ka meyong dangbo masütsü. Tsüngremi Pai mulungba nem mapang apir yimliji agütsür. Aji oda, khen khen aseni aser khen khen tangari ta yimsüsüa arudang, asenoki tangar yimsüsüba mapang inyakba mapa aser tenüngtem ajak mali küma melentsütsü merangra, asüng asen dak kasaji tangari inyaktsü. Koba telok südir süang aser shiba chuba aser lenir südir süang, taoba lenirtemi tajunga ta bilema kechi mapatem inyaka toktsüogo, itemji akümtsübutsüla . Nübortem jenjang yabo tenüng melenba agi masü saka nübortem meima ochishia inyakba agiang ajungtsü. India telongjem ya meraksanüra, kechi yimsü tenüng nunga jaa lidir liang, ajakji pei meyong küma anepalutsüla.