Otsüla, oboula nungeri chirnur semchi semnurtem dangi (Tsüngi o) sayupentsü o ka

– Mr. Imo Aier, Diphupar ‘B’ Dimapur.

Asen teyanglur Tsüngrem nük sakloka asen limai Khrista yimsü arur joko küm noklang ka sur lir pezü-pungu shi arur Tongmelang agi yimsü agizükba dak alaka Laishiba azüng ashi memetet tongmelang agi amanga aru. Iba sülen Laishiba azüng ashir theologian aika adoka Tsüngrem tanülai apoktsüba jangja jangja meteta tanula nung tenük saaka mongin küma Ao lima aser tanga kin dangi Tsüngrem Osangtajung ayimsünga ao. Ano Tsüngremi asen Ao limasa meimba temenen Tsüngrem Tsüngdang nangzüka taküm piyong Tsüngrem tenzüktsü tenangzükba tajung ayu, saka tanü tamangertem kar dak alaka ano temenen mapa dangisa meyiba machimajemtsü chiyongtsü chia jema Tsüngrem molung khuremdakja asen lima menena kümdaktsü. Tatasaba Tsüngrem asünung tanü Pa taochi nung asenok senupa yuja lir, iba den tamang tir ishikati asen aliba lima asoshi Pa terasaba tarudaktsüni ta nüktzü yima jeba mepishitsür aliba ajanga tanü yamai Pa taochi nung lia arudagi.
Temalen shia aliba onük dangi arudi, Otsüla, oboula nungeri Tsüngrem senmang amanga arunungji tanü parnok temoatsü nung lia arudagi, aser iba süngjangji chirnur semchisemnurtemi amanga arudar, Senior Citizen Sunday October 2 nü küm 60 nungi tema Tsüraburtem temenungratsüka tenla kidang temoatsü aser arishi meshia kanga longsowa tekülem sentep agia liasü (TEINTET ROGO) Teintet ta sürapang (Old age) pa joko temang shi koba tashi ka aintsü inadoker, shitsü, mesü pa tezü to intetadoker. Teintet Alima nung pa alitsü tashibo talangbalen liadoker, anungji item dangji teintet rogotem ta ajar. Joko otsüla oboula nunger küm nung tain tetsüng agi temang mati, tenük agi mangu, tenarong agi mangashir, tepo-a ajak tsükmar. Tanur kinü asüdang tetsüng pezü tener apua apua aoba amato, apua aoba mapang, shisatsü temolongjang ajak ramar teratettsü shisatsü tashi to mali lewar. Temesüng o agi (2nd childishness) tanur kinü ama küma aoba mapang joko temang ajak lurepa sentsü ajak jena teküp ajak atsürepa sorobangru kanga mejungi raksa-a arishi tatemleni aoba mapang, nütsü aser nübou iba mapang kanga nendaka meimang kütsü kuboui ni kinü asüdang koda meima anepalu aser ni tanü nübo junga mesüteta lir ta kanga meima anebaluang. Apijemtsü Shin 23:22 nung ya shia lir, na asoba nübu dang angang aser nütsü tantsür akümdang tesempa. Ano AP/Shin 15:20 nung yamai shia lir, shisa taka jabasoi tebu peladaktsür saka tamashi nisungi pei tetsü sempar. Alima nung alidang tenük agi anguba tsungremji nur tsürapurtemji lir, saka tsürabur ashi mangara aser akhüm metsübura na ali nung taso shia malitsü. Khen mapang yimtsüng ka nung Tetsü aser jalaa na raratep…jalai tetsü (Wangkhüm) Hangshizük tokdangja atem nung nongoktsü, ariana taküm nung Hangshizük aji dang azüker aliba tokdangtsü. Longmi agi atakba atem asünung atem tapok nungji azükjang teimbaka tokolen tsük, ibaji apayua tokoi tashei aidang jalai tzümolu tatsük meküplokja tetsü tzümolu tatsük jagi leter atem toko nungi jepyonga adok… tetsü molung khurema jala dang jashia mapang talangka timtema lir la alima nungi pila-a ao. Ashiko jalai tetsü akhüm tsüpua tashi anga ali asübo la-a ano arishia tatsükabo lilasüng ta bilemer, la den o tanep agi aser oyim agi (Approach) jembia tetsü peladaktsü asübo la ano taküm lilasüng ta bilemer, la sür kobi melii jala-a keyi ao, la lanutsür ka asüdang anojungi la paralyse süa yipden nung lai lasasa kecha meinyakteti kinüngboi dang anepalua timtema okronga lir süadok.
T. Ken 50:16 nung yamai zülua lir, saka tamashi nisung dang Tsüngremi ashi, kechi atema nenoki Kü ozüngtem tetshitsü aser Kü tezüngzüktepba nü bang nung ayutsü?
Ano AP/Shin 12:1 nung yamai ashir shibai temetongshiba meimer pai shisatsü meimer, saka tarürtsüba semparji tamachi. Otsü ka yamai atalok. Khen mapang ka nung tetsüi lar jala kinü asüdang parnok takdang nung mejanga yutsür la mapa inyakdang la mejangba takdang nungi mi adok. Tetsü aoksar mi tulu jangrua liaka tasü ita metsübui la mejangba takdang nungjagi lar jalaji anarongtena kümzüktet. Tetsü mi zübo agi tereprangtsü kanga mejungi aküm, ajisüaka lai timtem arema lar jala aiür küma mesütet. Kenü anogo la medemertem kidangi anir arudang la tetsü-a ta par medemtsür dang mesayunü kidang nungi ainshiasa lidaktsü, ibaji ngur kiyonger kidangeri yamai ashi, ‘Tenü nai kechiba na meimla nütsü tangar dang mesayuner, kenü na kinü asüdang nütsüi na mi lendong nungi anarongtena kümzük, idangji nütsü mi agi temang ajak rongsa-a soropangro mejungi aküm’, aji angashir la temolung raksa-a tenük nungi nüktzü alua ajep, kütsüi ni kümzüknüdang la temang yamai rongsa-a na-a ta panü nungi la dang meimtsü tenzük, nütsü soro mejongaka, nübu soro mejungaka aji nütsü aser nübu, shia metet-a liang, memetetia liang, kechi jenjang nung lidir liang aji nutsü aser nübu-sa asütsü.
Tsüraburji alima nungbo tenük agi angutsü, Tsüngrem ta meimtsü, mezüngmeshi masütsü, Tsüngremi Oi ashir. Alima nung asenoki tenük agi angur, tantsü tamburji temeimtsü jenjang kati ayir, parnok temang shi-azü ajak roseper ariana amentsü nokdaktsü, mejangtsü dak alaka parnoki kecha meinyaktet. Yimtsüng ka nung kenü anogo tambur ka moapu ka nung anü wanga mejanga alidang tanurtemi pa mesüshia salepsariba ajanga amoa mouteti aiben pa nem timtem agütsü… iba tambur koda molung khuremer alitsü ta nüklai arur.
2nd Chubatem 2:23-24 Elisha Bethel-i tuyaa alidang tanurtemi pa den ajuruteptsü aru, aser pa sensatsü, aser pa dang ashi, tuang na lemtsüba, tuang na lemtsüba aser pai pa sulen reprang aser parnok angu. Aser Kibuba tenüng nung parnok atakatem, aser arem nungi shirem tetsü ana adok aser parnok tanur 42 shisatsü. Ano Tsüngremi  T/Ken 50:16-17 nung yamai ashir, saka tamashi nisung dang Tsüngremi ashi, kechi atema nenoki Kü ozüngtem tetshitsü aser Kü tezüngzüktepba nü bang nung ayutsü? Kechiaser nai Kü tesayuba sempa, aser ne tesülen Kü otem endoker. Temeim chirnur, semchisemnurtem, alemlibo Osangtajung mangashiba aser memetetba agi odang toktsü, saka tanübo ajak sadakjema Pa Osangtajung angashia lir, iba nungi asenok tejak meyipra Tsüngrem nungi terasaba angutsü.
T. Ken 94:8-10 nung Nisung rongnung nenok tamashirtem angatetang, aser nenok tamashirtem kodangang shisa akatsü? Shibai asen tenarong yanglutsü, pai mangashilima? Shibai asen tenük yanglu, pai monglulima? Shibai kintem o bendanger, pai memerenshilima? Oda shibai nisung dang shisatsü sayu, pa shisatsü melilima? ta ashir.
Alemli otsüla, oboula nunger Tamang tir, Dr. E. W. Clark-i Khrista yimsü tajung bener aruba agizüka tanü asen lima tenük saaka Pa taochi nung lir arudar.
Yoel tapu 1:2-3 nungi, nenok tamburtem ya angang, aser linük nung alir ajak nenok tenarong tenang. Nenok tendak mesüra, nenok tsürabur tendak iba amai ataloker ma? Iba indang nenok chirnur dang shiang, aser nenok chirnuri par chirnuri dang shidakjang aser par chirnuri taruba putu dang shidakjang. Tamalen asen lenir kari Tir Yimyim nung tamburtem/tantsürtem anogo atema agütsüba nguogo. Tantsür tamburtemji alima nükdang, longzük tajung kaka lir, itemji anepalua mesütsü, sadoka alitsü, akhüm Tsübutsü atema United Nations-i 1st Oct 1999 anogo amongtsü lemtet.  India-ia Ministry of Social Justice and Empowerment Government of India-i 2007 küm yanglua state ajak nung monga arur. Govt-i aser NGO’s temi tantsür, tambur timtema aser sendoka aliba bushia anepalua teyari agutsür nung na jakzüka aruba tetsü tebou dang koda sür memeimtsü. SENDOKA LIRA TANü NUNGI MEIMDI ARUNG NA TEMOATSÜBA SüANG. AMEN.