Otsüsütsü aketba “Lijaba Sü Kolak Metaba Yu Mung” mesemtet

Wb. Imtitongba Tatar-i Ungma lushi nung otsüsütsü aketba ‘Lijaba Sü Kolak Metaba Yu Mung’ tesem lapokba tamaitsü nüngshilung ka azüngtsür külem yimsüsürtem den külemi tangokba noksa nung angur. Mokokchung, June 21, 2019.

Mokokchung, June 21 (TYO): Ungma yim lushi kübok ‘Lijaba Sü Kolak Metaba Yu Mung’ ta sür otsüsütsü aketba tesem ka June 21 nü yimsüsür tambuti Wb. Imtitongba tatar-i meraketa lapoktsüogo. Iba tesem ya Mokokchung town nungi kilometer 5 shi pilar Tuensang-i aoba lenmang anasa angutsü.
Tambu Imtitongbai iba otsüsütsü aketba tesem lapokja jembidang, Lijabaji alima yanglusang ta asen tsüraburi amanga aru aser pa den jungteperbo temoatsüsa agütsü, ta ashi. Akhi asen tsüraburi benshia arubatem tanü mebenshiaka, item otsüsütsü aketba mapatemji lanu putu asoshi wazüka ayutsübaji kanga tongtibang lir, ta paisa shisem.
Israel nunger iba ama otsüsütsü aketba tesemtem wazüka ayutsü meranger aser iba ajanga limapenzürtem puadakja par lima rongsenkettsüng renlokba angur. Yamaji Ungma lima iba ama otsüsütsü aketba tesem aika lir, anungji, itemji bushia renloktsütsüla aser iba ajanga limapenzür puadaktsüba dang masü saka lanur shisatsü tarok bushirtem asoshia ibai kanga tongtibang ka asütsü, ta paisa ashi.
Taoba küm ishika jakdang Ungma Senso Mungdangi lemtetba bangzüng ka mapa küma oboula Miponger chir tambusang Mongtidangnok dak jakzükertemi iba tesem yangerteta Ungma Kosasanger Pusu nem bendanga agütsüba mapa tajung asoshi tambu Imtibaisa pelaba lemsatepa liasü.
Iba tesem meshiteta Ungma Baptist Arogo Pastor, Rev. Dr. Nokleni sarasadem. Iba sentong nung Wb. Temsüzenba Longkumer tatar menden liasü. Sentong nung Ungma Kosasanger Pusu yimsüsürtem kanga medema arua meraketa aden.