Ouattara-i Ivory Coast Tir tanabenren abentsü jenjang angu

Abidjan, October 28 (Agencies): Ivory Coast Tir, Alassane Ouattara-i tanabenren küm pungo tashi par linük indang Tir menden abentsü jenjang tanü Bodbar nü nguogo.

Ivory Coast Election Commission-i taoba Deobar nü agiba Tir election nung bendenba vote züngdangba sülen Ouattara-i vote noklang nung shilem 83.66 ngua temaba jenjang anguba osang metetdaktsü.

Election Commission-isa ashiba agi, tan election nung nübur noklang nung shilem 60 shi vote agüja shilem agiba osang bushitetogo.

Voter tenüng tarensen nung nisung ka tenüng aiben inoksema aliba densema, tan election nung ozüng alema inyakba olen ka opposition telok, National Coalition for Change (NCC) yimsüsür kari metetdakja liasü.

Ajisüaka, tan election sentongji ochishia aser tebendang kecha melii ozüngi melaba ama agiba olen ka African Union aser West Africa linüktemi tentetba ECOWAS na nungi ketdangsertem densema, international tetendangertemi metetdaktsüogo.

Küm 5 tejaklen Tir election agiba sülen Ivory Coast nübur rong nung raratep tulu adoka nisung 3000 shi asüba yong tan election ya kanga dang tongtipang ta alimai züngshir.

2010 küm agiba Tir election nung Tir Laurent Gbagbo pusemertemi ballot jenti miim ayuba sülen Gbagbo jenjang tajungba küma ajungkettsüba yong pai Ouattara madak takok ngua Tir menden abentsü tenzük.

Ajisüaka, Gbagbo-i ochimashi lenmang ajanga Tir menden abentsü jenjangji angu ta shia, alima lenirtemi pa dang Tir menden nungi anentsü ajungshi saka Gbagbo iba tajungshiba olenji magizük.

Ita pungo shi süir külen, France mitkartemi nungitba Ouattara pusemba mitkartemi Gbagbo pua ayu aser Ouattara Tir menden nung mendaktsü.

Gbagbo tanga International Criminal Court (ICC)-i pua yua lir aser pa den sentakba ken o taruba November ita 10 nü ICC okadak angadangtsü sentong renema lir.