Oxford-i Covid-19 anema yangluba vaccine tajungtiba: WHO

New Delhi, June 28 (Agencies): Covid-19 anema yangluba vaccine 140 rongnung 13 tashi tang tendangdar aser item rongnung Oxford University-AstraZeneca aser Moderna Inc ajanga yangluba mozütem tajungtiba lir, ta World Health Organisation (WHO)-i metetdaktsüogo.
“Tang tashi yanglua aliba mozütem rongnung Oxford University-AstraZeneca aser Moderna Inc ajanga yangluba mozütem tajungba lir” ta WHO chief scientist Soumya Swaminathan-i ashi.
“Moderna indang vaccine ya July ita tom ka tashi nung clinical trials asemben agitsü. Ano, AstraZeneca-i maparen inyakba ajanga parnok indang vaccine ya alima ajungalen asüngtsü ama ajiteter” ta Swaminathan-isa ashi.
AstraZeneca-i meimchir dak AZD1222 vaccine candidate tendangtsü tenzükogo. Honibarnü Brazil-i Oxford-AstraZeneca vaccine yanglutsü atema $127 million tenangzüktep ka agiogo.
Brazil-i taküm December ita aser sangküm January ita tashi nung vaccine indang dose million 30 shi yanglutsü, ta Brazil nung health ketdangser Elcio Franco-i metetdaktsüogo.
US company Moderna Inc-ia vaccine candidate mRNA-1273 tendangtsü tenzükogo aser 2020 küm tatemlen tashi nung dose million 100 yanglutsü atema Catalent Inc den tesentaktep yangluogo.
France company Sanofi-ia Covid-19 vaccine candidate ka yangluogo aser taküm küm tatemlen tashi nung meimchir dak tendangtsü imlar ta metetdaktsüogo.
Thailand nung Covid-19 vaccine study 7 tashi lir aser parnoki ashiba agi taküm October tashi nungbo meimchir dak tendangtsü.
“Shingotem dak iba ajem tuloktsüba sülen azü tendangdang antibodies akümba bushitetogo” Chulalongkorn University nung Center of Excellence in Vaccine Research Development, head researcher Kiat Ruxrungtham-i ashi.
San Diego aser Vancouver nung vaccine dose 10,000 shi yanglutsü aser itemji meimchir dak tendangtsü atema Thailand-i bener arutsü, ta Kiat-isa metetdaktsü.