Ozil ajurutsü Loew nem temelaba magütsü

Berlin, Rongjui/September 26 (Agencies): Mesut Ozil international asaya nung anenba dak sendakba nung sensaksemtsü asoshi Tentonü Germany head coach Joachim Loew Arsenal training ground-i aru, saka pa Ozil den majurutepdaktsü.
Loew aser Germany team director Oliver Bierhoff na hopta tatemi FIFA coaching congress nung adentsü asoshi London-i aru aser Ozil den ken o jangjashiteptsü atema tenati north London kübok Colney nung Arsenal’s training ground semdanga liasü.
German daily Bild sangdong ka ajanga ashiba agi, Gunners head coach Unai Emery tetuyuba nung Loew aser Bierhoff na Arsenal training ground kikümbang nungi meyipa yok aser kasa mapang nung squad recovery session-i yok.
Tenati Arsenal semdangtsü asoshi tamalen sentong yangluadoker liasü anungji Loew aser Bierhoff nati Germany nunger Arsenal nung asayar Bernd Leno aser Shkodran Mustafi na denbo club indang visitors centre nung ajurutep saka Ozil denbo mejembi.
“Onoki Mesut den ajurutepnüa liasü, saka pai tangbo onok den sensakmesemner ta angateta lir,” ta Bierhoff-i ashi.
Ozil indang agent Erkut Sogut shiba den Bierhoff-i tongtepratepa liasü pai iba dak sendakba nung keno jangjashitsüstsü memulung.
Iba ita tetenzüklen Loew-i ashiba agi, pai Ozil den contact asütsü aiben merangdangogo saka mesütet.
Germany tenüng nungi 92 ben asayaba nung goal 23 aser assist 40 asüba sülen pai tir Reinhard Grindel dak rangloker German Football Association (DFB) telung nung akhümtsübutep mali aser kin dak ajemdaker mesenmetui amshir ta shia German team Chiteni/July toktsü.
“Grindel aser pa pusemer nükdang takok anguba mapang ni Germany nunger saka tamakok anguba mapang nungbo ni bendanglen nungi arur ka lir,” ta Ozil-i ashi. Ozil ya Germany nung aso saka tsürapurbo Turkey nunger lir.
World Cup nung tamakok anguba sülen social media balala nung Ozil mejeta kanga mejungi aitsüogo aser iba mapang nung Loew aser külem asayartemi pa pu masem.
Loew-i Ozil dak sendakba nung Luroi/Aug tatemlen ang yimjak nung jembia liasü aser national team yongtsü nung racism kecha mali ta shiogo.