Ozü Ato kilonser candidate ji Rahul Gandhi asutsü: Jaipal Reddy

New Delhi, Luchii/December 22 (Agencies): Tanü taoba mapang Union Minister, S Jaipal Reddy-i, 2019 Lok Sabha election nung party Tir, Rahul Gandhi Congress nungi Ato kilonser candidate asutsü, ta metetdaktsü.
Reddy-isa, ajisüaka Congress-i election magidang UPA teloktep tentettsü atema Ato kilonser candidate shimbaji tashishitsü onük ka mekümdaktsüner, ta ashi.
Osangbenertem senden nung jembidang Reddy-i, “Ozü Ato kilonser candidate ji Rahul Gandhi asutsü. Ibaji agizüktettsü atema tanga party temi mapang agitsüa akok. Iba atemaji ariteptsü menüngdak. UPA teloktep tentettsü atema Ato kilonser candidate shimbaji tashishitsü onük ka mekümdaktsüner,” ta ashi.
2004 küm election agiba sülen Sonia Gandhi Ato kilonser candidate shima liasü saka Sonia-i election osang sangdongba sülen ang UPA Ato kilonser atema telemtetba agitsü ta metetdaktsü, ta Reddy-i ashi.
Anungji Congress party nungi candidate shimbaji election tembangba sülen ang lemtettsü, ta pai ashi.
2004 küm election sülen Ato kilonser menden atema Sonia Gandhi-i Manmohan Singh tenüng benokba ama Rahul Gandhi-ia tangar ka tenüng benoktsü asü? ta asüngdangba langzüdang Reddy-i, tensa mapang apir Sonia-i shim, saka Rahul jibo balaka, ta ashi.
“Rahul ji ozü tongti lenir. Pa ya ozü Ato kilonser candidate. Ajisüaka Ato kilonser Narendra Modi anemba party tem den ozü party candidate atema mejembitsü ta mali,” ta Congress lenirisa metetdaktsü.
Tawa Congress lenir, M Veerappa Moily-i, West Bengal chief minister aser Left party temi opposition nungi Ato kilonser candidate atema Rahul Gandhi shimtsüji mapang tetemsü masü ta shiogo, ta metetdaktsü.
December 16 nüa Stalin-i Rahul Gandhi ji taruba Ato kilonser kümdaktsütsü, ta sangdongba den külemi tawa Assembly election nung Rahul-i Narendra Modi-i aniba sorkar tamakok ngudaktsüba atema tenüngsang agüja liasü.