Ozü jabaso nem security peria agütsütsüla: Kanhaiya tetsü

Bihat (Bihar) March 8 (Agencies): International Women’s Day amung nü, Jawaharlal Nehru University Students’ Union Tir Kanhaiya Kumar tetsü, Meena Devi-i lar jabaso taküm atema shisa kanga buluba ajanga pa nem security peria agütsütsüla, ta takhangba ka agütsüogo.
“Hinduvta telok nungi ozü jabaso taküm samatsütsü osang aruba ajanga pa kümzüka ayutsü asoshi ni kechi anga mesangyanger,” ta Mongulbarnü arishi küm 50 dak tema, Meena Kumar-i IANS dang ashi.
“Kanhaiya dak court nungang süng kanga mejungi azük, anungji pa JNU campus-i aruba sülen shibai pa taküm kümzüka ayutsü asoshi tenangzükba agütsütettsü,” ta Anganwadi centre nung ‘sevika’ ka ama tang teinyakdak Meena Devi-i ashi.
“Kanhaiya ya ozü jabaso dang masü saka asen linük jabaso ka lir anungji pa taküm kümzüka ayutsüji sorkar khuret lir. Pa tepseta entoktsü osang aruba ajanga ni kanga animesüngzükteter. Onoki inyaktettsü ajak agi, sorkar dang pa taküm kümzükang ta ashitsübaji dang lir aser iba telemtetbaji sorkari agitsüba dang,” ta lai ashi.
Kanhaiya nem bail melaba agi la, la kinüngbu Jai Shankar Singh aser par kinüngertem kanga pela liasü, ta Meena Devi-i ashidang, “Ajisüaka onok talangka mepelatet….onok ajak pa taküm asoshi kanga shisa bulur,” ta la shisem.
“Hinduvta teloki nüjiso atema nokdakba asoshi pa taküm samatsütsü,” ta laisa ashi.
Kanhaiya ya Bihat yim nungi lir aser iba yim ya Barauni jila, Begusarai nungi kilometre 3 shi dang pilar lir aser iba tesem ya Bihar Left party tesepti lir ta ashir.