Ozü jala den kibong kümteter nem sen crore 1,200 agütsütsü: Cecil Chao

Beijing, July 14 (TYO) : Hong Kong nung alir arishi küm 77 tain businessman, Cecil Chao-i, par jala, arishi küm 34 tain tobur tajung tetsür den tebur shibai kibong kümtetdir sen crore 1,200 agütsütsü, ta nangzükogo.

Tangatsüji melar melar amai ajisüaka par jala ya ‘lesbian’ ka lir aser küm aika tetsür den dang medema arur. Tesüiba mapang nunga jala yimya shibai melenshitsütetdir pa nem sen million pound 40 agütsütsü ta tebui nangzüka liasü.

Nisung aikati la den kibong akümtsü merangdangba nung tamakok anguba sülen, Cecil Chao-i pai nangzüka aliba sen anasü—pound million 80— kümtsü.

Jala Gigi ya tang tashi la kija dang lir, ajisüaka angashiba agi la ya Sean Eav den tang tashi medemdar aser ashiba agi tena küm ana tejakdang kibong aküm, ta tebu Chao-i ashi.

Chao-i sen agütsütsü nangzükba sülen tebur 20,000 shi-i Gigi den kibong akümtsü merangdanga liasü saka lai tebur shinga dena kibong akümtsü menangzük.

Ni ozü jala tejangrabatem nung mejangjungner ajisüaka la kibong tajung küma tanur sosemer jangratema aliba reprangner, ta tebui ashi.

Kübui ni atema tamajung inyaker ama ni mebilemer kechiba süra pai ‘homosexuality’ ya memelenshiteter ta mangateti ni meimba ajanga ibai inyaker, ta Gigi-i ashi.