Ozü lenir Supu Jamir aser K.T. Vilie dak tamang akar: NTAC

Dimapur, February 10 (TYO): February 10, 2017 nü Science & Technology & Jail Parliamentary Secretary, S. Hukavi Zhimomi-i osangkakettem nung JCC aser NTAC lenirtem aitsüba ajanga aoksar; JCC aser NTAC-i Supu Jamir aser K.T. Vilie lenisüba nung tamang kanga akar, ta Hokolbarnü Media Cell, NTAC Kohima-i sangdong ka ajanga metetdaktsüogo.
“JCC aser NTAC ya, nisung kar tajangzük atema tentetba masü saka Naga nunger tarutsü jenjang ajungtsü nükjidong nung tentet. Iba ya tribal/yimtenren nung ajemdaker tentet masü saka Naga nunger temeten atema Naga Tribal tentettemi nungita tentet. Anungji JCC aser NTAC-i lenirtem dak tamang kanga akar,” ta NTAC media cell ajangasa metetdaktsü.
“JCC Convenor, Supu Jamir aser NTAC Convenor, K.T. Vilie na ya tsüngro tasong, tetemjen aser akhümtaket lenirtem lir. Tamendakdak makai nai lenir Supu Jamir aser K.T. Vilie lenisüba aitsüba ya kanga tia maka,” ta NTAC Media cell-i ashi.
“Nübur lenir ka ama nai ya angatettsüla- ozü lenirtem nem tai tongloktsübaji tentet aser Naga nunger rangben aitsüba lir. Dimapur aser Kohima jila nung yi talubosa amshi, ta nai jembiba dak sentakba nung, lenir ka ama nai item mapatem meteta alitsü, anungji tenendak lenirtem aitsütsü agibo nai item atema mera agitsü liasü,” ta NTAC-isa ashi.
“Onok lenirtem dang ‘Asen lima Taliban yimya ama kümdaktsür, kong sen tashi ajanga mafia-i state yimsüsütsü meranger’ ta jembibaji nü office jenjang ajema kümdaktsüba lir. Nai ozü lenirtem dak lishi teploktsüba ajanga na mashimalu aser shisa mainba dang shisanger,” ta Media Cell, NTAC Kohima-isa metetdaktsü.