Ozü sorkar aser bank temji sensakertem atema lir: PM Modi

Varanasi (Uttar Pradesh), May 01, 2016: Deobar nü Varanasi nung aliba Assi Ghat nung Ato kilonser, Narendra Modi-i lokti den jembiba noksa nung angur.

Varanasi, May 01 (Agencies): Deobarnü Varanasi nung Ato kilonser, Narendra Modi-i, vote bank tashi itdaktsüba scheme dang nungibo nüburtem tashi itdaktsüba scheme temji tajungba, ta ashi.
Ato kilonser Modi-isa, “Sensakertemi sensak tia koktettsü atema onoki sensakertem nem tashi agütsür. Tatishitsü tajung kaji Jan Dhan Yojana scheme lir. Jan Dhan Yojana benokba ajanga sensakertem tali takaba kümdaktsüba onoki ajangshiogo. Sensakertem atema anüngdang aser aonung naprong meranga inyakba ajanga temelung asür,” ta ashi.
“Pradhan Mantri Mudra Yojana scheme ajanga, onoki bank tem dang sen apujang ta ashir, kechiyong iba linük ya sensakertem atema lir, aser bank temji sensakertem atema lir,” ta Ato kilonseri ashi.
“Mapang ka nungbo MP kati gas coupon 25 dang angu, aser gas connection agitsü atema sensakertem parnok (MP tem) kima tarensena noktak. Parnoki (taoba sorkar) gas connection 25 agüja liasü, (saka) onoki küm asem nung kibong crore 5 dak tema nem gas connection agütsütsü lemtetogo,” ta Modi-isa ashi.
“Iba linük, ozü sorkar aser bank temji sensakertem atema lir,” ta paisa shisem.