Ozüng alema arur Muslim nungertemi Assam nung lendong bener arutsü

Dibrugarh, September 20 (Agencies) : Assam nung Hindu mesüra tanga nisungtemi masü saka ozüng alema aruba Muslim nungertemi lendong bener arutsütsü ta Union minister Sarbananda Sonowal-i metetdaktsü.
“1971 nungi 2011 tsüngda Assam nung Muslim nunger nütsüng yongsük 197.39% renlok saka Hindu nungerbo 80.9% dang liasü” ta Union Minister for Youth Affairs & Sports, Sonowal-i ashi.
BJP-i iba onük atema süoki ia bilemer aser maneni ozüng alema arur nem yimtenren tashi magütsütsü atema inyaktsü, ta paisa shisem.
“Supreme Court-i Illegal Migrants Determination by Tribunals (IMDT) Act agienba sülen Muslim nunger telok 14 longjemer All India United Democratic Front (AIUDF) tentet aser parnoki Assam nung yimten tashi angutsü meranger” ta Sonowal-isa metetdaktsü.
Muslim nunger aika ozüng alema arua aliba aser parnok nütsüng renloka aoba ajanga Assam nung lisopur Muslim nungertem tetsükdaktsü ajurur, ta paisa ashi.
December 31, 2014 matongdang India-i aruba Hindu, Sikh, Jain, Parsi aser Christian minorities nem senso agütsütsü atema Centre-i lemtetba anema noktabaji Congress aser AIUDF nati ajungmesoba lir, ta
Paisa ashiba agi, “Assam-i dangbo item tangar menenepertem khuret mabentsü saka state ajaki lemsa agitsüla. Centre nung BJP sorkari Assam nung lisopur ajak temeten aser taginübatem kümzüka ayutsü”.