Ozüng alema bener aruba, sen lakh 15.97 alang moko apu

Guwahati, December 17 (Agencies): Customs Headquarters, Preventive Unit, Shillong ketdangsertemi Myanmar Cigarette Factory nung yangluba, sen lakh 15.97 alang “Ruili River” moko (cigarette) carton 40, Kamakhya Railway Station, Guwahati nung December 14 nü apu.
Item moko shibelensangji Dimapur nungi lir aser moko ajakji Howrah atongtsüba liasü.
“Ruili River” carton 40 ya Manipur tsütsü aliba India aser Myanmar arrtsülen nungi mima bener ait, ta mezüng bushisüngdang ajanga ngutetogo.
Bendang linük nungi moko shibelenertemi courier agency, railway aser passenger jajaba bus garitem ajanga item moko linük tesem balalai belenshir.
“Iba tatalokba nung ano shianga pua mali ajisüaka bushisüngdang maparenbo tenzükogo,” ta Deputy Commissioner Customs (Headquarters Preventive) I.R. Kharkongor-i metetdaktsü.
December 1 nüa Dimapur nungi belenshiba ‘GE Classic Golden Elephant’ aser ‘WIN’ moko carton 1397 tashi custom temi apu.
Tesüiba mapa nung Bangaladesh nungi ozüng alema moko kanga belenshia liasü saka tangbo Myanmar-i ajateta kümogo.
Ozüng alema bendang linük nungi moko bener aitba ajanga Assam aser Meghalaya state na nung küm shia sen crore 700 akoksar.
Cigarette & Other Tobacco Products Act (COTPA)-i moko pongdang nung temang atema temetettsü zülutsüba kecha bendang lima nungi mima bener aitba moko pongdang nung zülua mali aser ibaji ajanga sorkar indang tobacco control policy lendongi yoker.