Ozüng alema lisem, lungsang aser süng shibelenba anentsüla: Sonowal

Guwahati, October 20, 2017: Hokolbarnü Dibrugarh nung Assam Chief Minister, Sarbananda Sonowal-i Dibrugarh aser Tinsukia na nungi Forest, Police aser Civil Administration ketdangsertem den senden ka ayonga amenba noksa nung angur. 

Guwahati, October 20 (Agencies): Hokolbarnü Assam Chief Minister Sarbananda Sonowal-i forest department dang ozüng alema lisem, lungsang aser süng abenba maparen anenang ta tetuyuba agütsü.
“Assam CM-i forest department dang tangsatang ozüng alema lisem, lungsang aser süng shibelenba mapa anentsü tetuyuba agütsü,” ta sorkar sangdong ka nung metetdaktsü.
Sarbananda Sonowal-isa ketdangsertem dang lisem, lungsang aser süng belenba maparen indang osang tejangja züluoka ayutsü tuyu.
“Tezüluba aser lisem-longsang belenba nung meputepba kar danga putetra, aibelenba ketdangsertem ozü tesashi agi merenshitsü” ta chief minister-isa metetdaktsü.
Hokolbarnü Dibrugarh nung senden ka amenba sülen Sonowal-i iba tetuyuba agütsü.
Senden nung pai forest department, civil aser police administration dang lisem, lungsang aser süng shibelenba maparen tashishitsü melii inyaktsü ayongzük.
Paisa forest department dang PWD-i nüngdakba ama lisem aser lungsang agütsütsü metetdaktsü.
Arem nungi adokba rongsen ozüng alema shibelenba nokdangtsü atema Assam chief minister-isa police dang kümküma alitsü aser forest department den yaritepa mapa inyaktsü tetuyuba agütsü.