Ozüng alema sen saruba tenzükogo

Dimapur, November 18 (TYO): Mapang tatsüka atema ozüng alema sen saruba/tax agiba anena ataba sülen, check gate tem nung iba inyakyim tenzükogo aser iba ajanga kechisarena aika nung jenjang atur, ta Media Cell, BAN-i ashi.
Naga Council Dimapur (NCD) nung Public Action Committee (PAC) kübok kin teloktem aser tanga loktitentettemi mapa inyaka aruba amajok akümer ama bilemer. Benjong mongpu aruba mapang, Khristmas tenüng nung ‘tax fee’ sarutsü akok ta shishilembartemi bilema liasü saka mapa tamajung inyakertem indang tasa balaka liasü. Kanga dang tejashitsüka iba ajanga shishilembartemi jenjang atutsüsa akümer aser tax khuret ji sensotemi abentsü, ta parnokisa metetdaktsü.
NCD aser WC, NNPGs tsüngda mangatettep aliba onüktem angatettepogo ta osangkakettem nung züngshidang BAN kanga pelaa liasü, saka NCD-i kechi onüktem angatettep’ar sensotemi metetnür, ta BAN-isa ashi.
NCD ya Dimapur nung kin telok tongtiba lir aser PAC ama mapa tajung tenzükogo. Anungji iba ajanga ozüng alema tanen makai sen saruba khuret azüoktsü ta shishilembartem aser sensotemi teimla tulu lir, ta BAN-isa metetdaktsüogo.