Ozüng alema totzü meyoktepba manener: ACAUT

Dimapur, February 7 (TYO): Nagaland den arrtsü anasa Khatkati Lahorijan, Assam nung totzü abenba gari rongdokba ajanga ozüng alema totzü meyoktepba jungkai adoka sayur, ta ACAUT Nagaland-i metetdaktsüogo.
Ita ishika tsüngda, iba lendong ya tan agi tanabenbuba atalokogo aser iba ajanga totzü meyoktepba kuli sayur, ta parnokisa ashi.
State sorkari tentetba Special Investigation Team (SIT)-i ozüng alema totzü meyoktepba indang osang shitak magütsüba ajanga 2017 küm civil society teloktemi CBI nem iba ken o bushisüngdang südaktsütsü atema takhangba agütsü.
Ochimashi inyakba ketdangsertem, yimtenren lenirtem aser totzü meyoktepertem kümzüka ayutsü atema dang SIT report agütsü ta Co-coordination committee on Fuel Adulteration (CCOFA)-i PIL ka benok. Iba dak sendakba nung ACAUT-ia West police station nung FIR ka benoka liasü.
ACAUT-i Dimapur aser temeket nung ozüng alema totzü meyoktepba tesem aika puteta ao aser iba mapa ya Nagaland kübok inter-district dang masü saka inter-state maparen ka liasü ta putet.
October 1, 2017 nü iba ken o nung tongti süa tai tongloktsür Dhinanath Shah apu aser Assam kübok Rangia police station nung pa anema ken o ka benok. Dimapur nung totzü meyoktepba putetba sülen iba nisung yagi Assam kübok Lahorijan-i mapa belener maneni inyaker, ta ACAUT Nagaland-isa metetdaktsü.
Taoba küm pezü tashi ACAUT Nagaland-i senotsü aser nübo endoka okadaki oa noktaker aser aiben kuli agütsüogo, ajisüaka, tang tashi iba ken o metembangteter. Iba ya public atema kanga dang tongtipang lir anungji okadaki iba ken o tekaratiba nung angadanga obendang agütsütsü ayongzüker, ta ACAUT-isa ashi.
Maneni, Nagaland Lokayukta-ia ozüng alema totzü meyoktepba nung sorkari agütsüba kerosene amshiba maparen bushisüngdangtsü ayongzüker, ta parnokisa shisem.