Ozüng alema totzü meyokteper kar SK Oil agent lir : ACAUT

Dimapur, July 6 (TYO) : Nagaland nung ozüng alema totzü meyoktepa amshiba atema tongti süa tai tonglokja alirtem karbo SK Oil agent-tem lir aser iba ya kanga dang taoksatsü osang ka lir. Nisung 6 dak tai tonglokja aliba rongnung SK Oil Agent temji- Dinanath, Srikanth aser Umesh nunger lir aser parnok Power Of Attorney kübok mapa inyaker, ta Media Cell, ACAUT Nagaland-i sangdong ka nung metetdaktsü.
F&CS Department nungi osang kar angazükba agi, item nisung nem küm aika SK Oil agencies agüja arur. Anungji, ita shia Nagaland nem SK totzü litre 14,00,000 (14 lakh) lemzükba nungi litre lakh aika black market nung amshia alitsü ta ACAUT-isa metetdaktsü.
Nagaland nung SK Oil alemba tesemtem rongnung petrol pumps/fuel outlets dena lir aser gari totzü ayokdak aika nung kiburtemji SK oil Agent lir.
June 27 nü ozüng alema totzü meyoktepba tesem 6 putetba rongnung petrol pump 5 kibur Lalmohan indang ka danga mali ta ACAUT-i jangjashitsür. Pa indang totzü ayokba tesemtem nung ozüng alema meyoktepba totzü ayokba kuli kar melira, pa iba ken o nung maitsür. Gari totzü den kerosene meyoktepba tesem 6 putetba ken o nung Lalmohan, Nirmal Jain, PCTC aser Sumit Jain nunger sendakteptsü makok.
Police aser state sorkari tekaratiba nung SK Oil Agent tem aser ozüng alema totzü meyoktepba maparen tsüngda tesentaktep atema bushisüngdangtsüla, kechiyong iba mapa nung SK Oil tim mesüi amshiba kuli tejangja lir.
Tesüiba küm 10 nungi 15 tsüngda SK Oil license agütsüba inyakyim nung ochimashi aliba ajanga ozüng alema totzü meyoktepba maparen inyaker, anungji iba tebilemtsü khuret ya sorkari abentsü, ta ACAUT Nagaland-isa metetdaktsü.
SK Oil agents

You must be logged in to post a comment Login