Ozüng alemer mongin, Joaquin ‘El Chapo’ Mexico nung tanaben puogo

Mexico mitkartemi ozüng alema mozü mora shibelener mongin, Jaoquin Guzman Loera Mexico City tonga anir aoba noksa nung angur. Mexico mitkartemi Guzman ya Mexico northwest tsütsülen, Sinaloa state kübok Los Mochis yimti nung atsüka lia yashi Hokolbar anepdang apu. (Mexico City, January 09)

Mexico City, January 09 (Agencies): Ozüng alema mozü mora shibelener mongin, Joaquin ‘El Chapo’ Guzman Mexico nung tanaben apuba osang ka Mexico Tir, Enrique Pena Nieto-i metetdaktsüogo.
Mexico mitkartemi mita aoba sülen Guzman tepuokdak nungi jener ita 7 shi lir külen yashi Hokolbar nü tanaben apu ta pai ashi.
“Mexico mitkartemi miim osang kar angazükba sülen Guzman atsükdak, Sinaloa state kübok Los Mochis yimti nung tentetba ki ka mit aser parnoki idakji atsüka alirtem den ghonda ishika injang yoktepa tongpang raraba sülen Guzman apu,” ta Mexico Attorney General, Arely Gomez Gonzalez-i osang jangjashitsü.
Mitkartemi yashi Guzman sülen anidaker nisung 5 kasetba den külemi, parnok nisung 6 tashi apuba osanga jangjaogo ta pai ashi.
“Guzman tanaben apuba ya Mexico aser US napronglai ozüng alema inyaker madak takok tulu angur lir,” ta US Attorney General, Loretta Lynch-ia metetdaktsü.
Ajisüaka, Guzman US-i anir oa pa  nem temerenshi agütsütsü osangbo Lynch-i memetetdaktsü.
US sorkari Guzman par linüki anir oa idakji ozüng alema inyakba ken o nung ajemdaker tapet temerenshi agütsütsü asoshi Mexico sorkar den taoba mapang ken o benoka lir.
“Mexico-i Guzman tanaben apuba ajanga Mexico sorkari ozüng alema mozü mora shibelenbaren aser ozüng alema inyaktsü asoshi telok tentetbaren anema raratsü temulungtetba tulu ayuba kuli angur,” ta US Homeland Security Department nung Secretary, Jeh Johnson-ia metetdaktsüogo.
Mexico sorkari yaküm 2015 küm October ita nungi tenzüka Mexico northwest tsütsülen, Sinaloa nung Guzman aputsü maparen tenzüka inyakba osanga jangjaogo.
Guzman-i küm 14 tsüngda nung tepuokdak nungi tanabuba ajener küma, pai yaküm July 11 nü ali telung nung tunnel kilometer 1.5 shi tua pa puokba tepuokdak nungi jena Tir Nieto aser pai aniba Mexico sorkar nem maksü tulu bener arutsü.
Guzman ya 1993 küm mezüng pua tepuokdak ayu saka pai 2001 küm tepuokdak nungi ajenba sülen küm 10 shi jenshia lir külen sorkar mitkartemi pa tanaben 2014 pua tepuokdak puoka ayu.