Ozüng amshia inyaktsüla

Alima nung nisungtemi pei inyaknütsü inyakba ajanga tangar nem timtem agütsür aser lokti takoksa angur ta asüba tensa tia azüoka yimsü asütsü asoshi yimten (government) kümtet aser temzüng ozüng yanglu. Anungji, koba lima yimsüsürtemi temzüng ozüng shitak amshia yimsü asür aser nübortemia temzüng ozüng kübok tashi angaa anidaker, iba limaji tesünep nung nübortem ajak pei tangutsü tim ngua anisüngzüka alir. Atangji, temzüng ozüngji ajak atema, anungji yimsüsür o nübortem na tsüngda temzüng ozüng kecha balala mali. Ajisüaka, temzüng ozüngji tatar yimsüsüremiang lateter asünungji parnoki anir parnoki latetba temzüng ozüngji akümtsübua shitak amshitsübaji nübortem dangbo tatar yimsüsürtemang khuret tuluba lir.  Iba jagi dang pei lima aser pei yimten aser lokti nung temzüng ozüng kübok nübortem tipdema azüokteta litettsü. Atangji, temzüng ozüng kübok alitsübaji ajak atema tasak kechiyong pei inyaknütsü meinyaktsü saka senso nübortem ajak temeten aser maongka kasasa agitettsüsa lateta akaba temzüng ozüng kübok lateta akaba inyakyim nung maparen ajak inyaka aotsü. Tatishitsü agi, government-i nübortem alidak tzü tajemtsü agütsütsü asoshi pipe aika alitsü nüngdak adoker, ajisüaka iba pipe jenjangji pei ataknütsü mataktsü aser mapajia pei inyakdaktsünüba nisung nem meinyakdaktsütsü, saka nisung ajaki metettsüsa osangkaket nung ‘tender’ ajanga metetdaktsütsü aser shibai mesüra shirnoki jenjang shitak agi mapa shitak inyaktsütsüsa kuli agütsütetdir, parnok nemji inyakdaktsür. Iba jagi government senotsü kümzüker aser mapa tajungba nung renemer. Iba amaji government lenmang aser kiojen yangluba mapatem ajak inyaker. Ano, item ama mapa inyakbatemji ketdangsertemia jungjunga repranga inyakdaktsür külenang tetemsü mapang nung sen agütsür. Iba amaji temzüng ozüng kübok mapa shitak inyaka aotsü nükjidong nung government mapa nung ketdangsertem aika shimer. Ajisüaka, kodang asenoki Nagaland nung government nung alirtemi anir inyakba mapatem reprangdangdir, mapa aika ozüng paidoker pei inyaknütsü inyakba angur. Akhidanga yamaji inyaka aru aser tanga yaküm 2017 küm March 31 tashi nung state government kübok department balala shiai inyakba mapatem sükdangba osang nung Comptroller & Auditor General (CAG)-i ashiba agi,  Nagaland nungbo kaketshirtem asoshi scholarship yokba sen tashi magütsüi tangalen amshi, tzü pipe sen crore 242 jenjang tender kecha magütsüi pei alinütsü ali, aser ki meyanglu ser nung yanglur ama sayua sen agizüka agiba temulung malemtsüsa mapa aika ataloka lir. Ibayongji, itemji  Vigilance Commissioni bushisüngdangtsüla aser ozüng alema inyaker ketdangsertem anema FIR agütsütsüla ta CAG-isa shia lir. Tang CAG-i kaktettsüba amajisa yimsüsür aser ketdangsertemi anir state nung temzüng ozüng aser inyakyima kecha lateta maka amai inyakra, Nagaland nung terenlok sentongtem kodanga mapa küma meinyaktettsü. Government mapa inyaktsüba maparen nung tender magütsüi pei alinütsü aliba aser pei mulungba nisung nem dang terenlok mapa inyakdaktsü tashi asen lima merenloktsü. Mapa meinyak sen agizüka agitetba lima nung kodaser terenlok mapa takok ngua inyaktettsü. Joko, asen lima ajungtsü mechi asenoki ozüng alema pei inyaknütsü meinyaktsüla. Atangji, ozüng alema pei inyaknütsü inyakba mapa nung senotsü tajangzükbo tulu alitsü, iba jagiang inyaker. Ajisüaka, nisung ka ana takar akümtsü saka nübortembo sensakdaktsütsü, nisung ka ana chuba amai anisüngzüka alitsü saka nübortembo alar amai timtemdaktsütsü ta asüba shisatsübo asenok shinga daka malitsüla . Asenbo tebok ajak chizüka yiratsü saka pei limabo süngdang amai küma kongradaktsütsü ta asüba mapa nung kecha jangratemtsü mali. Aji oda, tang nungi danga asenok tulur tilar na pronglai pei kija ajangzüktsü dang mebilemi pei lima aser pei nübortem ajangzüktsü asoshi bilema ozüng kübok lateta akaba inyakyim ajak shitak amshia litetra, ibaji Nagaland ajungtsü asoshi inyakba tenla tulu asütsü.