Ozüng amshirtemi aibelenra

Linük nung ochimashi maparentem nokdangtsü asoshi bushisüngdanger telok tematiba Central Bureau of Investigation (CBI) nung dena parnok ketdangsertem rongnung kati ka aputsüsa inyakbaji linük asoshi kanga lendong lir. Iba amaji, ano Nagaland nunga ozüng alema machimajemtsü shibelener ket nungi police-temi pua ayuba brown sugar seret tenet shi Nagaland police ketdangser kati pei kidang oa ayubaji taoksatsü osang ka lir. CBI nung inyaker süli, Nagaland police nung inyaker süli, parnok nükjidong aser mapaji kasadang, kechiyong parnok ajakji ozüng raksaba aser ochimashi mapatem nungi linük kümzüka ayutsü asoshi lir. Ajisüaka, tang amaji parnokiang tangar tai nembangtsütsü asoshi sübokrem meshira aser ozüngi memelaba oset aser chiyongtsütem parnok kidangang bener oa yura, nübortem asoshi tarendaktsü aser tetsübutsüji aji asütsü. Shitakba nung pei lima aser nübortem tenzükba mapa nung nisung shiai pei mapa agi taküm kuli tajung agütsütsüsa alitsüla. Aji oda, Tsüngrem tenzükerji Tsüngrem tenzüker ama, tesayurji tesayur ama aser sepaiji sepai ama pei mapa aser taküm agi kuli tajung agüja alitsü nüngdaker. Tangbo sepai nung tulurtem indang jembir saka sepai tilatiba katia pei taküm yimya aser mapa agi tangar teyari aser temoatsü angutsüsa alitsüla. Aji oda, Nagaland nung drugs mayoktsü aser machitsüba indangjibo yutsür yi dena meyokdaktsütsü aser yijemba mapatem nokdangtsü asoshi ozüng lateta lir aser item ozüngtemji mapa küma inyaktsübaji police-tem mapa aser khuret lir. Ajisüaka, policetemiang drugs yokra mesüra chira, yi yokra mesüra jemra koda asütsü ? Angazükba agi, election agiba sülen asen lima nung ano mozümora achiba wara agi kanga mejungi tonga lir. Tangbo sen jenjang dalang agi tablet alia achir masü saka sen tasak jenjang powder ‘brown sugar’ mokozü nung aseketer. Iba jagi lanurtem aika taküm raksadagi aser tsürabur aika shisabolu tulu agi tongogo. Iba waraji arogo nung sarasadem aser sayutsüngi o den ozüng amertemi mapa shitak inyaka menokdangtetra, anogo putu ka chir mali küma samatsü. Iba ama mapang tamajung agi asen lima kangshidang, asen lanurtem taküm kümzüktsü aser tsüraburtem mulungjang anisüngzükdaktsütsübaji ozüng amshirtemi kanga khuretsa bilemtsüla. Maparen aika nung ozüng raksaba mapatem menokdangtetbaji ozüng tashimaitba agi masü saka ozüng amshirtemiang ozüng mali ama inyakba ajanga tebilemtsü ajurur. Aji oda, CBI leniriang sübokrem meshira aser police tanishirtemiang drugs aser yi pei gari nung bener jajara, linük nung ozüng komaka akanga latetdir latetaka tamakok angutsü. Atangji, ozüng amshirtemiang ozüng raksaba mapaji, tanga agi masü, saka sen otsü dang lir. Ajisüaka, asenok ajaki metettsüba kaji nübortem ashioktsüba aser putu ka chir ajak samatsüsa inyakba mapatem nungi anguba rongsenjibo kodanga senmang küma mamshitsü, iba jagi asen shisabolutsü aser iba jagi asen arishiang temdoktsü.