Ozüng anema mijang aturtem mittsü: Dr. Imtiwapang Aier

Mokokchung, Jan 19 (TYO): Nagaland Geology & Mining Parliamentary Secretary, Dr. Imtiwapang Aieri Jan 19 nungi tenzüka Mokokchung, Longleng aser Mon district kübok ali mijang (coal mine) atuba tesemtem sema jajadagi. Parl. Secretary den department nungi OSD (Geology & Mining) O. Koratemjen aser mining engineer (Mokokchung incharge) T.Semy aser sorkar tongtipur kar densema liasü.
Tanü pai Mokokchung district nung mijang atudak semdanga jajar külen osangbenertem den jembidang, asen lima ali telung nung aliba rongsen jenti dang lir, talisa ali mijang (coal mining)-tem koba jenjang nung lir itemji asadangba den item dak sentakba nung nüngdakbatem repranga jajar, ta pa tour senzüba nükjidong lemsatep.
Asen lima nung ozüng anema mijang atur (illegal miners) aika lir, talisa parnok jagi tzü mopung tali menentsür, anungji, itemji koma ser mittsü aser tzü mopung meraksai mijang atuba ajanga nübur tajangzük kadaktsütsü par department-i yakta maparen kar inyaktsü tebilemba ka paisa ashi. “Ozüng anema mijang aturtemji kanga junga mita reprangtsü”, ta paisa shisem.
Ozüng anema mijang aturtemji talisa yimtak village council kari sorkari memeteti temelaba agütsür tudaktsür ta ashi. Item ozüng anema mijang aturtem jagi ‘Nagaland Coal Policy & Rules’ (NCPR) temzüng nung aliba ama manidaker, ta paisa tebilemtsü kar lemsatep.
Iba ama mijang atutsü temelaba agütsütsüji village council kisüng dak tashi mali, saka NCPR temzüng nung shia aliba ama anidaktsü nüngdaker. Yimtsüng kari danga dept majangi mijang atutsü temelaba agütsüba nung aibelenra VDB senpong dena sottsü sorkar dak tashi aliba indang Geology & Mining nung ketdangser kati tekümdangtsü ashi.
Dr. Imtiwapangisa dept-i inyaka aotsüba indang kar lemsatepdang, tongtibangsa ozüng anema mijang aturtemtem kanga junga mitba maparen kar inyakba den alima tzü mopung kümzüka aser wazüka ayuba dak sentakba nung metetjem (awareness) sentong kar yakta tenzüktsü, ta ashi. Iba den ano par dept ajanga sorkar nem tajangzük (revenue) tali bener arutsütsü asoshi meranga inyaktsü, ta paisa shisem.
“Village Council-i iba maparen dak sentakba nung amalitepa meyarira ozüng anema mijang aturtemji sottsü makoktsü”, ta paisa ashi.
Ozüng anema mijang aturtem nokdangtsü asoshi yimtsüng ajak dangi dept ajanga tekümdangtsü shiti yokba den NCPR temzüng tali rajema kümdaktsütsü maparen kar inyaktsü, ta dept ketdangser katisa metetdaktsü.
Angazükba agi, 2014-15 tashi nung Mokokchung district kisüng nung mijang atuba nungi sorkar tajangzük (revenue) arubaji 1.10 crore liasü. Sorkari mijang ton ka nung senpak 290/- tax agir.
Tanü Dr. Imtiwapang aser par teloki Lakhuni, Khar, Chungtiayimsen nung aliba mijang atudak tesemtem semdanga liasü. Iba sülen January 20 & 21 nü Mon aser Longleng district na sema jajatsü sentong renema lir.