Ozüng lungpak ; Efesa 4:17-32

Mosai ashi: Aser pai itemji lungpak ana nung zülu aser aji kü nem agütsü. Tazüng. 5:22
Kin shia ozüng balala yanglua lir. Itemji parnok timtemdaktsütsü atema masü saka parnok kümzüka alitsü atema ayur. Lendong timtem adokdang aibelentsüji kechi nung lir ibaji ozüng jagi tarakji sayur.
Kasaji Tsüngremi ozüng terji lungpak nung zülur agütsü. Aikati Tsüngremer ozüng meliteter, aser ibaji raksaa inyaker. Memeshiba, azütokshiba, aser libaliro majungba aser iba mesükbatem jagi pei dak aser tangar dak teraksa tulu adokdaktsür. Tsüngrem ozüng terji maneni nüburtem kümzüktsü asoshi akanga yua lir.
Tsüngremi Pa ozü ter akanga aser tejangja yanglu kechiaser Pai asenok meimer. Pa temeim tali tejangjaba nung par chir sempet agütsüba nung angatetdaktsür, shiba aru aser asenoki temenen ajanga raksaa aliba tasen küma yanglushitsü asoshi meyipa agi. Pauli ashir, “Khrista nung asenok Tsüngrem temeshibaji akümtsü asoshi, shibai temenen memetet pa asenok atema Pai temenen kümdaktsü” (2 Kor. 5:22). Shirnokisa Khrista dak pei kibur ama amanger ajak Tsüngrem tsüngdang temeshi lir.
Kibuba Tsüngrem, temeim agi Nai onok nem ozüng ter agütsü. Itemji onoki benshitettsü yariang kechiaser onoki Na meimer. Amen.