Ozüng tejen 58 agientsü atema Lok Sabha nung bill ka benok

New Delhi, July 25 (Agencies): Ozüng tejen 58 agientsü atema Brihostibarnü sorkari Lok Sabha nung bill ka benok.
Iba bill benokdang Law Minister, Ravi Shankar Prasad-i, item ozüngtemji mapet aser nüburtemi lendong ajurutsüsa lir, ta metetdaktsü. Iba bill benokdang Opposition züngsemtemi, onük balala nung o lemteptsü atema MP tem nem mapang magütsüi sorkari bill tem aritepa agizüker, ta aitsü.
Prasad-i, Narendra Modi-i aniba sorkari ozüng tejen 1,458 bo agienogo aser iba dak sendakba nung maneni ozüng 58 agientsü atema benoker, ta metetdaktsü.
Sorkarisa, iba bill nung o lemteptsü atema mapang magütsü, ta opposition-i jembibaji tai, kechiyong anogo ana jelia notice agütsüogo, ta ashi.
Prasad-isa, iba bill ya tang ang benoker, anungji züngsemtemi iba bill nung o lemteptsü akok, ta ashi.
Union Minister, Ram Meghwal-i, business advisory committee senden nung iba bill atema o lemtepogo; tongti party ajak nungi züngsemtem iba committee nung lir, ta ashi.
Lok Sabha Speaker, Om Birla-i, senden nung bill ka mebenokdang anogo ana jelia züngsemtemi iba bill indangji shisadangtsü atema pai inyaktsü, ta metetdaktsü.
Speaker-isa, British nunger yimsüsüba mapang aliba ozüngtem agiener tanga ozüng agi melentsü nüngdak, ta metetdaktsü.
Iba mapang nung opposition züngsem kari, Indian Penal Code ya-a British nunger yimsüsüba mapa aliba ozüng ka lir, ta nemnema liasü.
Opposition aser ruling party züngsemtem tsüngda o toktepdang sorkar pusema BJD züngsem, Bhartruhari Mahtab-i, business advisory committee nung iba bill atema o lemtepogo, ta metetdaktsü.
Congress MP, Shashi Tharoor-i, pai Repealing & Amending Bill, 2019 bill anema menokdaker, saka bill balala aritepa agizükba ya sorkar yimya tamajung ka lir, ta aitsü.