Ozüng tejen 58 agientsü atema Parliament nung bill ka agizük

New Delhi, August 02 (Agencies): Central ozüng tejen 58 agientsü atema Hokolbarnü Parliament nung bill ka agizükogo.
Rajya Sabha nung voice vote ajanga Repealing & Amending Bill, 2019 agizük. Iba bill ya Lok Sabha nungbo July 29 nü agizüka liasü.
Tanü Rajya Sabha nung iba bill benokdang Union Law Minister, Ravi Shankar Prasad-i, BJP-i aniba sorkari akümba sülen sorkari menüngdakba ozüngtem agientsü atema telemtetba agia liasü; committee kati ozüng tejen 1824 jangjaogo, ta metetdaktsü.
Tang tashi nung ozüng tejen aser central acts 1,428 agienogo aser President rule atema state tem asoshi yangluba ozüng 75 shi tang tashi nung agienogo, ta Minister-isa metetdaktsü.
Tang agizükba bill ajanga mapetba/menüngdakba ozüng tejen 58 agientsü, aser iba ya ozüng ishiba akümtsü saka yimsüsübabo tajungba akümtsü atema lir; ozüng tejen reprangshia agienba ya tamalen nungi inyaka aruba mapa ka lir, ta Prasad-i metetdaktsü.
Telangana Rasthra Samithi (TRS) nungi MP, K Keshava Rao-i, Andhra Pradesh legislative council menden dak sendakba nung 2015 küm indang ozüng ka agienba atema ashishiba dak sendakba nung Minister-i, state atema bilema inyakogo aser iba ozüngji tongti Act nung densema lir, ta metetdaktsü.
Cinematograph Act, 1952 agienba atema ashishiba dak sendakba nung Minister-i, taoba mapang Information & broadcasting minister tangatetbaji pai akümtsübur saka film nung inyakertem iba onük nung obang ka asütsüla, ta ashi.
Iba bill nung o toktepdang Subhashish Chakraborty (AITC), Bhupendra Yadav (BJP), Amee Yajnik (Cong), A Navaneethakrishnana (AIADMK), Prashant Nanda (BJD), Kahkashan Perween (JD-U), K Somaprasad (CPI-M), Binay Visham (CPI), aser BJP nungi Veer Singh aser Ram Kumar Verma nungeri shilem agia liasü.