Ozüngi melaba garitem menokdangtsüla: Dimapur DC

VOLUNTEER TEMI METRE 1 TEPILA AYUTSÜLA

Dimapur, March 28 (TYO): Dimapur district kübok yimtsüng aser ward kar nung tim mesüi inyaksangshiba osangtem angazüker, ta Dimapur Deputy Commissioner, Anoop Khinchi, IAS-i sangdong ka nung metetdaksü.

Yimtsüng aser ward kar nung tongtipang nüngdaktem abenba, medical aser sorkar garitem mesenzüdaktsür. Iba denji külemi tanga state/linük nungi arurtem nem timtem agütsür aser yimtsüng/ward telungi maitdaktsüba osang angazükogo, ta Dimapur DC-isa ashi.

Iba atema pai village council chairman/VSM/GB nem item tetuyuba agütsüogo.

1. Tongtipang nüngdakbatem abenba gari aser sorkar garitem (exempted) menokdangtsüla.
2. CrPC 144 nung lateta aliba ama volunteers mapa lemzüktsütsüla aser kati ka tsüngda tepila ayutsüla.
3. Tangalen nungi arurtem anogo 14 quarantine asütsüla. Parnoki iba ya meinyakra District Administration nem osang sangoktsütsüla.
4. Ward/village council den yariteper volunteer temi masks, gloves, sanitizers amala protective gears enoktsüla aser volunteer temisa meter 1 tetsüngda ayutsüla.

Paramedical staff-i mapa meinyaktettsü tenokdangba agütsüra aser ki kiburtemi paramedical staff pur ki toktsür oang ta timtem agütsüra, ibaji IPC nung arrla 188 kübok temerenshi alitsü, ta Dimapur Deputy Commissioner-i metetdaktsüogo.

Iba ya Disaster Management Act, 2005 aser Epidemic Disease Act, 1897 kübok ozüng agütsür, ta paisa ashi.

DC Anoop-isa, Dimapur nung tamangba yimsü aser lokti lennirtem dang metre kabosa tepila ayutsüba indang osang prokshitsü atema mepishia metetdaktsü.