P.A. Sangma nem Padma Vibhushan sempet agütsü

Shillong, January 25 (Agencies): Taoba mapang Lok Sabha Speaker inyaksang, asür Purno Agitok Sangma nem Padma Vibhushan sempet agütsüogo, ta par kinungertemi Bodhbarnü metetdaktsü. Iba sempet ya India nung civilian tem nem agütsüba konang tetushi senpettem rongnung tanabuba lir aser Meghalaya nungi iba sempet ya Sangma-i mezüng agizüker asütsü.
“Sorkar ajanga Padma Vibhushan sempet pa nem agütsüba ya northeast nüburtem aser tongtibangsa asen Garo nüburtem asoshi asoshi konang tetushi tulu lir,” ta asür Sangma kinungtsü, Soradini K. Sangma-i Australia nungi osangbener dang telephone ajanga ashi.
“Onok kanga pelar. Pai asen nüburtem aser linük asoshi taküm bendanga agütsür mapa tajung aika inyakba ajanga iba sempet ya pa nem agütsür südi,” ta lai shisem.
“Linük ajunga nungi nüburtem aser talisa Garo tenem kintemi kübu dak temolung lema meimba yong Parliament nung Meghalaya nübur tenüng nung terben tashi shimteta mendaktsü,” ta asür Sangma’er jabaso aser Tura MP, Conrad K Sangma-ia ashi.
“Sangma-i India linük aser Meghalaya state atema mapa tajung jenti inyakba ajanga pa nem iba sempet agütsütsü kanga tetemsü. Pa ya Parliament nung Speaker tajungtiba liasü. Iba sempet pa nem agütsüba ajanga Meghalaya nüburtem nüma tangdaktsür,” ta Padma Shri sempet ngur alisang, Patricia Mukhim-ia ashi.
Atal Bihari Vajpayee, H.D. Deve Gowda aser I.K. Gujral nunger teloktep sorkar mapang 1996 nungi 1998 tashi Sangma ya, Tribal nisungtem rongnungi mezüngbuba Lok Sabha Speaker inyaka liasü.
Saka pa dak asayamenu jakla aliba ajanga, Parliament senden amenba mapang khuret aser rarabangsen aika anenja liasü. 11buba Lok Sabha senden amendang, taoba India Prime Minister P.V. Narasimha Rao-ia Sangma dak iba sempet aliba kanga tushia liasü.
Sangma ya national politics nung tetsüng majemokdang, lecturer, lawyer aser journalist mapa inyaka liasü. Pa-i 1988 nungi 1990 tashi Meghalaya Chief Minister inyaka liasü.
Sonia Gandhi mechi Congress party nung mangatettep adoka 1999 küm Sangma den Sharad Pawar aser Tariq Anwar nungeri Nationalist Congress Party tentet.
2012 küm India Tir inyaktsü asoshi pa medemer Pranab Mukherjee den toktep, saka pai takok mangu aser iba sülen 2013 küm pai National People’s Party tenteta liasü.
Sangma ya September 1, 1947 küm Meghalaya nung aliba West Garo Hills kübok Chapathi yimdak aso aser yaküm küm March 4 nung temolungjang agi mapa meinyaki New Delhi nung asü.