P.B Acharya-i AAVAAHN- 2019 nung jembi

Dimapur, March 17 (TYO): March 17, 2019 nü Nagaland Governor P.B. Acharya-i IIT Delhi nung AAVAAHN- 2019 sentong nung aden.
Iba sentong nung Screen writer, Columnist aser Author Advaita Kala debn den sensaksemdang P.B Acharya-i “asen linük nung university 800 shi lir aser iba nungi Nagaland state nugng university 5 lir” ta ashi.
“University Education nung loktiliba aser linük tenzükba indang sayutsüla. Lisopurtem aliba tesemtem tashi itdaktsütsü atema education agütsütsüla aser iba atema university temi research mapa inyaktsü, ta Acharya-isa ashi.
Paisa kaketshirtem aser mapa shia metetertem dang “nenoki bendangleni maotsüla saka asen linük ajungkettsütsü atema yangi lia shisatsü agütsütsüla aser mapa inyaktsüla” ta mepishia metetdaktsü.
Paisa IIT aser University kaketshirtem dang Northeast state tem semdangtsü aser ali rongsen den sobaliba indang study/research agitsü atema ayongzük.
India ya Secular Nation ka lir anungji asenoki tamangba yimsü ajak akhümtsübutsüla, ta Acharya-isa shisem.
Kaketshirtemi küm shia Nagaland dena tanga Northeast state tem semdangtsüla aser idakji aliba nübortem den ajurutepa sensaksema parnok sobaliba aser ali rongsen takartem indang osang metettsü merangtsüla, ta Governor-isa ayongzük.
Iba sentong nung Dinesh Kumar, IAS Commissioner & Secretary to the Governor aser Kethosituo Sekhose, Dy. Resident Commissioner, Nagaland House, New Delhi nati Governor Acharya meina ao.