P. B Acharya-i asür Prof. Gangumei Kamei mang ayimer

Dimapur, January 07 (TYO): State Angh, P. B Acharya-i, “Ni kü tembar tajung asür Prof. Gangumei Kamei mang ayimer aser par kinungertem den asükhu lemsateper. Asür Gangumei Kamei ya ‘Federal Party of Manipur’ nung Tir inyakba mapang nungi ni meteta liasü,” ta mangyima ashi.
Pa nem lemzükba mapa balala nung pai kilonser mapa-a inyak liasü aser Manipur sorkar nung MLA aiben inyakogo. Gangumei Kamei akümlidang pai Rani Ma Gaidinliu taküm otsükaket ka zülu aser iba kaketji Indian National Fellowship Centre-i adoktsü. Indian National Fellowship Centre ya 1980 küm Bombay nung tentetba NGO lir.
Indian Institute of Advanced Study, Shimla ajanga Gangumei nem National Fellowship sempet agüja liasü. 2012 küm pa BJP nung aden aser Manipur Lok Sabha Constituency nungi toktep.
Pa North East Council, Ministry of DoNER, Government of India nung kanga tongti züngsem ka teinyakdak mapang iba lima nungi pilaogo.
Pa ajaki tushiba professor ka, kaketzülur tajung, lokti atema nendaka inyaker, yimsüsür aser item ajak dang alia pa nisung tajung ka liasü.
Pa asüba ajanga ni küm 40 dak tema meteta aliba kü tembar tajung ka samaogo, ta Angh-i ashi.
Acharya-i, “Kü melungjang taroktiba agi tang temulung zürep tia nung aliba asür kinungertem aria bilemba aser sarasadem lemsateper. Pa asüba ya Naga nunger, talisa Zeliangrong nüburtem asoshi takoksa tulu lir, ta ashi.
Pai jabaso asem aser jala ka ta yutsür iba lima nungi pilaogo. “Iba ama shisabulu tia nung alidang asür kinungertem nem anisüngzük agüjang ta ni Tsüngrem dang sarasademtsür aser asür tanela süngjema anisüngzükdakjangma,” ta Angh-isa ashi.