P.B Acharya-i HSLC aser HSSLC takok angur nem Governor’s Award agütsü

June 08, 2016 nü Raj Bhavan, Kohima nung HSLC & HSSLC tatidang 2016 nung Toppers nem tetushi agütsüba sentong tembangba sülen Nagaland Angh, P.B. Acharya, Commissioner & Secretary, School Education, F.P. Solo aser NBSE ketdangsertem HSLC 2016 Toppers den külemi tangokba noksa angur.

Kohima, June 08 (TYO): Tanü June 08, 2016 nü Raj Bhavan, Kohima nung Nagaland aser Assam Angh, P.B. Acharya-i HSLC & HSSLC tatidang 2016 nung toppers aser rank holders nem Governor’s Award tetushi agütsüogo.
Tawa HSLC aser HSSLC tatidang nung takok angurtem nem tetushi agüja Acharya-i, “Atangji, iba ya tepela anogo ka lir. Iba ya nenok tarutsü tia yanglu tetenzüker lir,” ta metetdaktsü.
Paisa tesayurtem, school ketdangsertem aser tsüraburtemi kaketshirtem aser pei chirnurtem len ania nungitba ajanga school aser kibong nem tenüng tajung bener arutsüba atema tenüngsang agütsü.
Acharya-isa tamakok angur kaketshirtem dang, tamakok angubaji tarutsü nung takok angutsü atema tayongzükba ka dang lir, ta ajungshi.
Angh-i kaketshirtem dang, kanga temelenshi aliba lima ka nung kaketshir ka ama asenoka alima den liromedema alitsüla, ta ashi.
Tanurtemji kanga senti kechiyong parnokji asen senmangertem ta shia Angh-i bangdakpurtem, school ketdangsertem, rejutem aser tsüraburtem dang parnok nem shisaliok ajanga tashi agütsüba agi asen linük yangerdaktsütsüla, ta ayongzüka jembi.
“Kija atema masü saka asen lokti terenlok atema asen kaketshirtemji shisaliok ajanga tashi itdaktsütsüla,” ta ashi.
Angh-i, shisaliok ajanga tashi agütsüba mesüra degree ka angubaji temaba nükjidong masü, iba ya azükaru atema tetenzüker ka dang lir, ta ashi.
“Asen linük terenlok atema ‘Employment aser Education” naji tongtibang. Shisaliok ajanga tashi angurtemji mapa bushirtem masü saka mapa agütsürtem asütsüla.” ta paisa shisem.
Asen state aser linük tejakleni oa terenlok alitsü atema Nagaland-i tuluka inyakteta lir. Ali nungi anguba asen rongsen, solar energy, organic chiyungtsütem, aou, sütakba, teka mapa, tzü temerük aser tzüinji asen terenlok atema amshitettsü,” ta Acharya-isa ashi.
Kasa sentong nung Commissioner & Secretary School Education & SCERT, F.P Solo-ia item awards agütsüba atema Governor dang pelaba olen ka nung, State nung tekolak kati HSLC & HSSLC toppers nem awards agütsüba state ji Nagaland dang lir, ta ashi.
Solo-i, “Angh aser pa kinungtsüi Naga nunger atema, talisa kaketshirtem ama lanurtem atema kanga bilemja inyaker. Tenati tesem aika sema yimtaklirtem aser lanurtem den shisa lemsateper. Parnoki Govt. Primary School nung school tanurtem den mid-day meal lemsatepa chiyungbaji asen tanurtem atema tajungtiba ka lir,” ta ashi.
Iba sentong nung Topper rongnung nisung asem- Kikali Achumi, Gulabsa Khatum aser Metisivile Seyie nungeria parnok takok anguba otsü lemsatepa liasü.