P.B Acharya-i Kohima nung ‘Swachhta Hi Sewa’ tenzükogo

Dimapur, September 15 (TYO): Nagaland aser Arunachal Pradesh Angh aser Swachh Bharat Abhiyan indang Brand Ambassador, PB Acharya-i September 15, 2017 nü ‘Swachhta Hi Sewa'(Cleanliness is Service) campaign tenzüktsüogo.
Tanü sentong nung Angh-i, ‘meshimeshia aliba sülenbo merükmejuba lir anungji asenoki asen temeket merükmejua ayutsüla’ ta ashi.
Paisa public toilets temerük ayutsüba indang olen ka lemsatepdang, state nung kilen shia metsümeshidak tajung lir saka public toilets peria mali, ta ashi.
State yimtiba nung alirtemi pei temeket aser kiyong merükmejua ayutsüla. Asen state nung tourism tajungba kümdaktsünüra, asenoki asen yimtsüng aser jilatem merüka ayutsüla, ta Angh Acharya-isa ayongzük.
Sentong agiba sülen Angh den Road and Bridges Minister, Dr. Neikiesalie Kire, Housing Parliamentary Secretary, Er. Levi Rengma, Chief Secretary, Pankaj Kumar aser tongti ketdangsertemi Super Market tesem merükmejuba mapa inyak.
Iba sentong nung mendenji Kohima DC, Rajesh Soundararajan liasü aser Housing Parliamentary Secretary, Er. Levi Rengma-ia o tatsüka jembi.
India Prime Minister, Narendra Modi-i August 27, 2017 nü ‘Mann Ki Baat’ jembidang, linük nung September 15 nungi October 2, 2017 tsüngda Swachhta Hi Sewa inyaktsü tayongzükba agüja liasü.
Iba dak sendakba nung Angh Acharya-i Nagaland Legislative Assembly nung züngsem 60 aser Members of Parliament 2 dang SHS campaign nung shilem agitsü atema shidi zülu.
SHS campaign mapang Ministry of Drinking Water and Sanitation-i linük ajungalen yimtsüngtem nung ODF agientsü atema twin pit toilets yanglutsü.
SHS campaign ya tanü Tir Ram Nath Kovind-i Kanpur nung tenzükja liasü, ta PRO to Governor sangdong ka nung metetdaktsü.

PHED-i Cleanliness is Service campaign tenzük
Kohima, September 15 (TYO): Tanü Public Health Engineering Department (PHED) Nagaland-ia parnok Directorate nung Swachhta Hi Sewa (Cleanliness is service) campaign tenzüka liasü.
Iba sentong nung Water and Sanitation Support Organisation (WSSO) Director, Y Tep-i okila jembidang, October 2 tashi state ajungalen lokti nübodoka merükmejutsü aser metsümeshidak yanglutsü, ta ashi.
Paisa ketdangsertem nem Swachhta Hi Sewa tenangzükba agidaktsü.