P.B.Acharya-i Maha Shivaratri aser Sekrenyi benjung salem abener

Dimapur, February 24 (TYO) : Nagaland aser Arunachal Pradesh Angh, P.B. Acharya-i Maha Shivaratri aser Sekrenyi benjung indang salem metetdaktsüogo.
February 24 nü Hindu nungeri Shivaratri benjung aser asüng (Feb 25) Angami Naga nungertemi Sekrenyi benjung amungtsü, ta PRO to Governor sangdong ka nung ashi.
Maha Shivaratri tetezüji “the Great Night of Shiva” lir aser iba benjung ta Shiva tsüngrem nem tetushi agüja amunger. Iba ta Hindu nunger atema kanga dang tongtipang benjung ka lir, ta sangdong nung shia lir.
Iba benjung nung Lord Shiva külemertemi aonung memejangi pa külemer aser Hindu nunger aikati Lord Shiva temples semdanger mesüra Jyotirlingams-i temeshi aini aoer. Tanga Hindu benjung teimbaka anüngdang amunger saka Maha Shivaratri yabo aonung dang amunger, ta PRO sangdong nungsa metetdaktsü.
Maneni, Angh-isa Angami nunger den Sekrenyi benjung tepela salem abener, ta PRO to Governor sangdong nungsa ashi.
Angami nunger “KEZEI” ita nung anogo metsür pungububa nung iba meshitetba benjung amunger. Anogo 10 nü benjungmung dang Angami nungertemi Phousanyi ta-a ajar. Iba benjung nung alu dak sendakba mapa ajak anener aser chiyungtepba aser kentenba ajanga benjung amunger, ta Angh-isa metetdaktsü.
Iba benjung ajanga Angami nunger aser talisa Naga nunger ajak tsüngda temeim aser telongjem akangshitsü imlar, ta paisa shisem.