P B Acharya-i Mission Million Books project lapoktsü

Dimapur, Yimpoksüi/November 12 (TYO): Taoba Nagaland Angh P B Acharya-i Mongolbarnü Nagaland nung Mission Million Books project, Rotary Club Dimapur nung lapoktsüogo.
Iba sentong ya Rotary Club Dimapur aser Indian National Fellowship Centre Ratna Nidhi Chritable Trust aser Rotary Club Mumbai sentepa ayongzük.
Sentong nung o jembiba mapang Acharya-i, asenok tebilemdangba melenshi lokti aser state terenlok asoshi inyak tenzüktsü atema mapang tongogo, ta ashi. Paisa, Dimapur nung alirtem atema tasümang abentsü asoshi gari ta bendanga agütsü, koba Dimapur Rotary Club project ka lir.
Sentong nungsa Princiapl Director School Education, Nagaland Shanavas C-i, kaketshirtem yongtsü nung kaket azüngba yimya tajemba küma odar ta ashiba den kaketshirtem dang kaket tem tajungtiba nung amshitsü ayongzük.
Ratna Nidhi Charitable Trust mendenbuba Rajiv Metha-i ashiba agi, iba project ajanga linük ajunga nung kaketshirtem nem jenjang aketba kaket azüngtsü atema maongka agütsütsü. Kasa mapang nung Ratna Nidhi Charitable Trust-i Nagaland nung alemtsü atema kaket 12,000 tenla agütsü.
Rotary International, director Kamal Sanghvi aser Nagaland Post, Editor, Geoffrey Yaden natia sentong nung o jembia liasü, ta ketdangser sangdong ajanga metetdaktsü.