P.B Acharya-i Moayimti nung Multispeciality & Research Centre lapoktsü lungzüng azüng

Mokokchung, Fen 17 (TYO): Bodbarnü Nagaland & Assam Governor, P.B Acharya-i Moayimti yimtak Beth Shalom Diagnostics, Multispeciality & Research Centre asütsü atema lungzüng ka azüngtsüogo. Iba mozüki asütsüba ya REM ta ser telok kati Corporate Service Responsibility (CRS) inyakba maparen ka lir. Moayimti ya Mokokchung nungi kilometer 70 shi pilar lir.
Governorbai tanü lokti senden Longtho nung aliba mapang jembidang, pa iba yimtsüngi arutetba ya jangratemtsü aser maongka lir aser India ya yimtsüngi akümba linük ka lir ta ashi.
Yimtak yimtsüng nung alirtem aser jila balala nung alirtem ajak kasa dang, anungji, shingaia ilaa mesüra olua mebilemi tejakleni aotsü merangtsüla ta pai ashi.
Paisa merükmejungba tsütsü inyakdaktsünüba olen ka ashidang, “merükmejubaji kija/kibong nungi tenzüktsüla” aser India linük ya temerük aser tobur tajung lima ka kümdaktsütsü khuret süa inyaktsü ajungshia liasü.
“Nagaland ya takar lima saka Naga nungerji sensaker, aji oda, India limaji takar saka India nungeri sensaka alir, anungji, asen lima nung aliba ali rongsentemji timi ketdangsüa amshitsüla” ta paisa ashi.
“Asenok mejangba nungi saktsüla” aser “asen mulungsentsü melenshir tejakleni aotsü mapang lir” ta paisa tayongzükba ka agütsü. “Asenok ya mapa bushir masü saka mapa agütsür akümtsü merangtsüla” ta paisa shisem.
REM telok nung Managing Director & Chairman, Temjen Imna Along Lkri mapang tatsüka jembidang, tang tashi nung par teloki Swachh Bharat mapatong kübok yimtsüng 34 tashi nung yimkong meshimeshidak, yimkong tetsüng lenmang (steps) aser retaining wall mapatem inyakba indang osang metetdaktsü.
Tanü koba REM ajanga Beth Shalom Diagnostics, Multispeciality & Research Centre mozüki asütsü atema lungzüng azüngogo, iba mozükiji küm asem tsüngda renemtsü aser yangji tetsür/tebur balala atema shirang yipden 150 shi yutettsüsa aser cabin 30 shi alitsü. Iba den ano ibai multispeciality agütsüba mozüki ka asütsü nükla yur tenzüker ta REM MD & Chairman-i osangbenertem den jembidang ashi.
Iba mozüki ya REM kübok aliba company trok (6) den ano bendanglen aliba Partner Company-tem lungjemer senotsü teyari ajanga yanglutsü ta Alongisa ashi.
REM teloki CSR mapatong kübok lokti asoshi maparen balala inyakba indang kar lemsatepdang, tang tashi nung yimtsüng 34 tashi nung nüburtem aser lokti asoshi maparen balala inyakogo aser par telokisa ano yimtsüng 70-80 tashi ayimjema inyaktsü tebilemba aliba paisa lemsatep.
Metsümeshiba yanglutsü atemaji REM teloki sen 1.4 lakh agütsür, tetsüng lenmang yanglutsü atema 1.5 lakh aser retaining wall atemajibo nüngdakba apir senotsüji lemzüktsür. Shir yimtsüngi junga meinyakdir senotsü sota ayur ta paisa ashi. Ibai tongtibangsa mapa junga inyakdaktsütsü nükjidong yur yamaji inyaker ta paisa shisem.
Tanü iba kasa sentong Swachh Bharat Mission kübok Phase I, II & III kübok metsümeshiba, tetsüng lenmang aser retaining wall tajungtiba yanglurtem nem konang tetushi (Award) agütsü.
Mokokchung D.C Sushil Kumar aser Swachh Bharat Mission Nagaland Brand Ambassador S.Supongmeren Jamir natia shilem agia liasü.