P.B. Acharya-i Nagaland House, Kolkata semdang

Dimapur, November 4 (TYO) : Nagaland Angh, P.B Acharya-i Gangtok, Sikkim nung NEZCC senden nung adentsü atema aodang, November 2, 2016 nü Nagaland House Kolkata nung anenzüka, idakji aliba ketdangsertem aser Staff den ajurutepa sensaksem mapang liasü.
Iba mapang P.B. Acharya-i Diwali salem metetdaktsü aser Nagaland House nung staff nem mitai agüja liasü.
“Asen loktiliba akangshitsü atema asenoki Diwali, Christmas amala tamangba benjung ajak amungtsüla. Nagaland state adena orr aliba Nagaland House temji ‘Mini Nagaland’ ka ama lir. Anungji, Nagaland House staff temi tangar dang state indang sobaliba tajung sayutsüla aser lokti nung tangar den putepa alitsüla” ta paisa ayongzük.
Angh-isa ketdangsertem aser staff dang tashi angatsü, mapang shitak amshitsü aser ‘Mapa inyakbaji Tekülem’ ta asüba tangatetba nung alitsü atemasa ayongzük.
Paisa, Deputy Resident Commissioner dang Prime Minister’s Welfare Schemes tem- Jan Dhan Yojana (PMJDY), Pradhan Mantri Suraksha Bima Yojana (PMSBY) aser Pradhan Mantri Jeevan Jyoti Bima Yojana (PMJJBY) amala teyari agütsütsü atema tetuyuba agütsü.
Sentong nung DRC Arenla-i Nagaland House staff ajak tenüng nung Angh dang pelaba metetdaktsü.