Dimapur, November 19 (TYO) : November 18, 2016 nü Nagaland Angh, P.B Acharya-i Nagaland University (NU) semdang aser telok balala den ajurutepa sensaksem mapang liasü.
Angh P.B Acharya ya Nagaland University nung Ex-officio Chief Rector lir aser pai NU ya tangazükdak tongti ka asütsü aser loktiliba tajangzük anguba reju ka asütsü ayongzük.
University-i sayubaji lokti den puteptsüla aser state atema rongsen aser tagitsü ka ama asütsüla, ta paisa shisem.
Naga nungeri tetsü tasola oshi kümzüka ayuba ajanga pei maitsü wazüka ayutsüla. Nagaland ama state tila ka nung kin 16 den sub-tribes kar lir, aser kin shia pei indang maitsüji mesamatsü atema kümzüka ayutsüla, ta P.B Acharya-isa shisem.
“Naga nunger sobaliba aser ali nung takar. Naga nungerji tejungnü, saisaponger aser social activist tem lir saka tanü tashi Nagaland sensak tia nung lir, kechiyong sen arubaji nisung kar keti dang aoer. Centre-i sen crore aika agütsür, saka nisung kar keti dang senji aoer. Nagaland takar, saka Naga nungerbo sensaker,” ta paisa metetdaktsü.
Naga nungeri tebilemba melenshitsüla. Naga nunger dak sempet aika lir aser kanga tajung. Naga nunger taküm jenjang tajungba akümtsü aser asen state azükarudaktsütsü atema mapang ka aruogo, ta Nagaland Angh-isa shisem.
Paisa Vice Chancellor dang undergraduate aser post graduate level nung skill subject tenzüktsü atema tebilemba lemsatep.
Alima nung University tajungtemji sorkar ajanga masü saka iba university nung azüngba kaketshirtem adokdaktsür. Anungji, Naga loktiliba nung milen amertem asütsü atema NU-i takok anguba nisungtem adokdaktsütsüla, ta Nagaland Angh-isa ayongzük.
Sentong nung Acting Vice-Chancellor, NU, Prof. AK Singh-i Angh pela agizüka jembidang, Angh-i state nung yimjung atema tongti mapa inyakba atema tenüngsang agütsü.
1997 küm Lumami nung academic maparen inyaktsü tenzükba sülen nungi tang Lumami yimtsüng melenshiogo, ta VC-isa shisem.
You must be logged in to post a comment Login