P.B Acharya-i National Conference lapoktsü

January 13, 2017 nü Central Institute of Horticulture Medziphema nung Nagaland Angh, PB Acharya-i National Conference indang nüngo kaket sayatsüdang agiba noksa angur. 

Dimapur, January 13 (TYO) : January 13, 2017 nü Nagaland Angh, PB Acharya-i Central Institute of Horticulture Medziphema nung National Conference ka lapoktsüogo.
Iba Conference ya “Advance in India Floriculture with Focus on North East & Hill Region” indang lir.
Tanü sentong nung jembidang, Angh Acharya-i, “Ni kaketshir telok, loktiliba atema inyakdang, yimten lennir ka ama inyakdang aser tanga wadang balala nung sentongtem nung dena aruogo, saka tanü anogo ya tajungtiba, kechiyong iba sentong nung adenba ajanga ni aika angazükogo,” ta ashi.
Prime Minister Modi-i asenok dak linük tulu ka akümtsü tashi lir ta shiogo aser paisa North East merenlokra India tejakleni maotsü ta metetdakja lir. 2006 küm India sorkari Nagaland nung Central Institute of Horticulture lapoktsübaji maongka tulu ka lir, ta Acharya-isa metetdaktsü.
2002 küm Agriculture nungi Horticulture balaka razüka ao. Iba sülen nungi India kübok tesem balala nung Horticulture department kanga renlokyonga odar, ta paisa ashi.
Asen shisaliok rejutem nung küm shia Arts, Science aser Commerce nungi graduates aika adoker. Ajisüaka, asen shisaluyimba inyakyim nung skill development mali aser iba jagi zünger mapa manguba timtem ajurur, ta Nagaland Angh-isa shisem.
Paisa ashiba agi, Nagaland nung ali rongsen jenti lir saka tang tashi state bo sensak tia nung lir. Anungji, asenoki asen wadang nung nendaka mapa inyaktsüla aser ibaji ajanga dang asen state renloktsü, ta paisa ayongzük.
Tanü Angh Acharya-isa horticulture department-i lapokba stall aika semzüktsü aser nüngo kaket sayatsüba den certificate/award tem lema agütsü.