P. Jongpong Jamir takum otsu kaket saya

Dimapur, Mongputeni/Oct.29 (TYO): Kangtsung nunger wabong P. Jongpong Jamir IPS (Rtd.) ajanga züluba pa taküm otsü kaket ka tanü (Mongolbar) Diphupar nung par kidang arogo aser yimten lenirtem den medemer aser kinunger adianutem aika adenshia lia Tir Yimyim Yimozülür Wb. K. Temjen Jamir-i sayatsüogo.
Iba kaket sayaba anogo ya pa kinungtsü Wt.Asenla tena kibong kümer küm tenem ajungba anogomong liasü .
Pa ya Kangtsung yimti nungi mezüngbuba theology nung graduate aser mezüng NPSC tatidang nung takok ngua Nagaland Police Service nung officer akümba lenir ka liasü.
Pa ya lanuwa kanga timtema tangar kidang kilia intetba aser school azüngdang Naga yimten tensa tamajung nung timtem tetsubu aika tizükteta takok ngua tajung akümba lenir ka lir .
Pa ya philosophy nung master degree ngua azüngba tashitemeteter ka liasü, anungji pa khenbo Patkai Christian College nung tesayur inyaka liasü.
Pa ya police department nung IGP tashi tua inyaker 2011 küm mapa nungi anen.
Mapa nungi anener külena pai mazüngi lokti aser arogo ajungshia inyaker aser kaket zülur tajung ka lir. Pai tamalen kaket tajung ka tenüng agi “Toktsüba Dangi Meyipba” zülua lir.
Tanü iba sentong nung Diphupar Ao Baptist Arogo nung sannüker N.Lipok Jamiri P.Jongpong Jamir taküm otsü kaket meshitetja sarasademtsü aser par medemertem den ano Kangtsung yimten aser arogo nungi lenirtemi tepela o jembia liasü.
Tang Wb.Jongpong Jamir aser pa kinungtsü Wt Asenla arishi küm 75 lir.
Iba sentong nung menden East Dimapur Baptist Arogo nung sannüker Wb.I.Jongpong liasü.