P Longon-i NHRC nung laparoscopic training centre lapoktsü

May 29, 2016 nü Health & Family Welfare Minister, P Longon-i Nikos Hospital & Research Centre managing director, Dr. Victo A Wotsa nem laparoscopic training centre indang kulikaket agütsüba angur.

Dimapur, May 29 (TYO) : Nagaland nung temang anepalubaren tsütsü teyari tulu ka angutsü atema mapa tajung ka inyakogo aser ibaji Deobarnü Nikos Hospital & Research Centre (NHRC), Dimapur nung laparoscopic training centre ka lapokba lir.
Iba centre ya Federation of Obstetrics & Gynaecology Society of India (FOGSI)-i recognized süa lapokba lir aser National Accreditation Board for Hospitals & Healthcare Providers (NABH)-i NHRC nem accreditation agütsüba mapang nung iba ya lapokogo.
Nagaland nung mezüngbuba NABH accreditation anguba mozüki Nikos Hospital asütsü aser North East Region nunga tasembuba lir. Iba denji tanü lapokba laparoscopic training centre ya North East nung mezüngbuba asütsü.
Tanü Health & Family Welfare minister, P Longon-i ‘accreditation & inauguration’ sentong nung tongti tesemdanger ka ama shilem agi aser pai o jembidang ashiba agi, “nübortem nem healthcare service tajung agütsütsü nükjidong nung Dimapur nung nija mozüki aika lapoka aoer aser iba ajanga state sorkar nem teyari agütsür.”
“Tanü asen lima nung healthcare service asen kishizüng nung lir aser Naga nunger doctor temi tangalen aliba doctor tem den kasa shia meteter yarir” ta Longon-i ashi.
“Nikos Hospital-i NABH nungi accreditation anguba ama, asen lima nung aliba mozüki ajaki tenüng tajung angutsü imlar. Iba mozüki ajanga asen Naga nunger doctor tem den Northeast state tem nungi doctor temi Dr. Victo dang nungi laparoscopic training agitsü aser iba nungi angazükba ajanga asen nübortem ajangzüktsü imlar” ta paisa shisem.
Nagaland state nung doctor tem yongsük kanga ajema lir aser iba jagi asen state nung medical college melapok tashi tangalen nungi doctor tem teyari agitsüsa akümer, ta Health & Family Welfare minister-isa metetdaktsü.
Tanü sentong nung tetushi süa jaoker aser NABH director, Dr. Gayatri V Mahindroo-i NHRC managing director, Dr. Victo A Wotsa nem accreditation certificate agütsü.
‘Nikos’ ya takok anguba den tetezü kasa lir aser NRHC-i quality healthcare agütsütsü atema mapa inyakba nung accreditation angubaji mezüngbuba mera lir. Accreditation anguba den laparoscopic training centre lapokbaji Nagaland nung alirtem atema dang masü saka anameta aliba state tem nungi shirangertem atema maongka tulu lir, ta Dr. Gayatri-isa metetdaktsü.
Sentong nung adenertem pela agizüka jembidang Dr. Victo A Wotsa-i centre lapoktsüba aser accreditation angutsü atema mapa inyakba nung tetsükdaktsü jenti ajuru ta ashi.
Sentong nungsa Director, Health & Family Welfare, Dr. John Sweyievisa; Kohima Obstetrics & Gynaecology Society of Nagaland president, Dr. K Keditsu aser Dr. Jyoti Ramadas nungertemi o jembi aser tadenertem rongnung PHE Minister, Tokheho Yepthomi liasü.