P5+1 teloki par tangatetbaren melenshir: Zarif

Vienna, July 10 (Agencies): P5+1 ta ajaba teloki par tangatetbaren melenshitsü tenzükba den külemi, par takhangbarena tesashiba akümtsü tenzükba olen ka Iran Foreign Minister, Mohammad Javad Zarif-i tanü Hokolbar nü metetdaktsüogo.

Britain, China, France, Russia aser US den külemi, Germany densemba P5+1 telok aser Iran na tsüngda Vienna nung amenba nuclear senden tatembanglen kati arutsü tenzükba mapang ka nung Zarif-i tanü iba olenji metetdaktsü.

“P5+1 teloki par tangatetbaren melenshitsü tenzükba den külemi, par takhangbarena taoba mapang nungi tang tesashiba akümba ajanga ozü telok ana tsüngda nuclear tezüngzüktep tatem küma agitsüren nem tetsükdakba bener arutsür,” ta pai ashi.

“Ajak nem tajangzük bener arutsütsüsa nuclear tezüngzüktepji agitsü asoshi ozü Iran-i melunga lir. Senden amenba shia, tebilemba aser tasa tasen benoktsüji yimya dang lir saka ajaki taoba mapang renemba ama jembia inyakba ajanga dang tan senden nung shilem agir rong nung tangatettep kati arutettsü,” ta pai shisem.

Tashiyim mesüra amokmerenba ajanga agizükdaktsütsüsa P5+1 teloki onük benoka mejembitsüla kechiyong tashiyim agi linük ka ajemrepa ayutsü merangba ajanga mangatettep aser tesempatep tali adokshidaktsür ta Zarif-i metetdaktsü.